नेपाल पूर्वाधार 
लमजुङ । लमजुङमा निर्माण सम्पन्न २५ मेगावाटकाे माथिल्लाे दाेर्दी ‘ए’ जलविद्युत आयोजनाबाट विद्युत उत्पादन सुरु भएकाे छ । लिवर्टी इनर्जी हाइड्रोपावर कम्पनीले निर्माण पूरा गरेकाे आयोजनाबाट बिहीबारदेखि परीक्षण उत्पादन सुरु गरिएकाे हाे ।
दोर्दी गाउँपालिका–६ ढोडेनीस्थित आयोजना एक महिनाअघि निर्माण सम्पन्न भएको हाे । विभिन्न चरणकाे परीक्षणपछि नेपाल विद्युत प्राधिकरणकाे प्राविधिक टाेलीले विद्युत प्रसारण प्रणालीमा जाेडेकाे आयोजनाका प्रवर्द्धक राजेन्द्र वस्तीले बताए ।
“हामीले लामाे समय लगाएरै भए पनि आयोजना निर्माण सम्पन्न गर्याैं । आयोजनाबाट परीक्षण उत्पादन थालिएकाे छ । अबकाे २ सातासम्म परीक्षण गरी आयोजनाबाट व्यापारिक उत्पादन सुरु गर्नेछाैं” उनले भने । उनका अनुसार कात्तिकबाट व्यापारिक उत्पादन सुरु हुनेछ । आयोजनामा १२.५ मेगावाटका २ वटा उत्पादन युनिट छन् ।
याे आयोजना पहिले नै निर्माण सम्पन्न भइ सञ्चालनमा आइसक्नु पर्ने थियाे । तर, प्रसारण लाइनकाे समस्या तथा बर्खामा आउने भीषण बाढीले संरचनामा क्षति पुर्याउँदा पटक–पटक विद्युत उत्पादनकाे तालिका प्रभावित हुन पुगेकाे थियाे ।
क्षतिग्रस्त संरचनाकाे मर्मत तथा पुनर्निर्माण गरेसँगै प्रसारण लाइनकाे समस्या पनि समाधान भएपछि उत्पादन सुरु गरिएकाे कम्पनीले जनाएकाे छ ।“आयोजनाको बाँधस्थल लोदो खोलाबाट दुई हजार सात सय मिटर लामो भूमिगत सुरुङ र २ हजार ७ सय मिटर लामो पेनस्टक पाइपमार्फत दोर्दीखोलाको पानीलाई विद्युतगृहमा झारिएको छ । र विद्युतगृहबाट विद्युत उत्पादन भएकाे छ” वस्तीले भने ।
आयोजना निर्माण सम्पन्न गर्न ३ अर्ब ९६ करोड रुपैयाँ लागत अनुमान गरिए पनि निर्माण अवधि सम्बिएपछि लागत थपिएकाे कम्पनीले जनाएकाे छ । अब याे आयोजनाको लागत प्रतिमेगावाट १८ करोड ५४ लाख रुपैयाँ पुग्ने कम्पनीको अनुमान छ ।
२०७१ बाट निर्माण थालिएकाे आयोजना २०७४ सालमा सम्पन्न गर्ने लक्ष्य थियाे । तर, विनासकारी भूकम्पपछिको अघोषित नाकाबन्दी एवं २०७६ भदौमा आएको बाढीका कारण आयोजनाकाे संरचनामा क्षति पुगेपछि निर्धारित समयमा निर्माण सम्पन्न हुन सकेन ।
सम्झौताअनुसार आयोजनाको निर्माण सम्पन्न गर्न नसक्दा पटक–पटक म्याद थप गर्दै आएको थियो । आयोजनाको बिजुली हिउँदको समयमा प्रतियुनिट ८.४० रुपैयाँ र वर्षायाममा ४.८० रूपैयाँ नेपाल विद्युत प्राधिकरणले खरिद गर्नेछ ।
दाेर्दी काेरिडाेरमा याे आयोजनासँगै पिपुल्स हाइड्रो पावर कम्पनीले जिल्लाकै ठूलो ५४ मेगावाटको सुपर दोर्दी ‘ख’ निर्माण गरिरहेकाे छ । याे आयोजनाकाे काम पनि अन्तिम चरणमा पुगिसकेकाे छ ।
हिमालयन पावर पार्टनरले निर्माण गरेको २७ मेगावाटको दोर्दीखोला निर्माण सम्पन्न भइ सञ्चालनमा आइसकेकाे छ । त्यस्तै, दोर्दीखोला जलविद्युत् कम्पनी प्रवर्द्धक रहेकाे १२.१ मेगावाटको दोर्दी–१ पूरा हुने चरणमा छ ।
