नेपाल पूर्वाधार 
काठमाडौं । सोलुखुम्बुको दूधकोसी नदीमा १८८ मेगावाटको सुर्के दूधकोसी जलविद्युत आयोजना निर्माण हुने भएको छ । यति वर्ल्ड इन्भेष्टमेन्ट प्रालिले जिल्लाको खुम्बु पासाङल्हामु र माप्य दूधकोसी गाउँपालिका तथा सोलुदूधकुण्ड नगरपालिकामा संरचना रहने गरी आयोजना निर्माण गर्न लागेको हो ।
प्रवर्द्धक कम्पनीले आयोजनाको वातावरणीय प्रभाव मूल्याङ्कन (इआइए) प्रतिवेदन तयार गरिरहेको छ । प्रतिवेदन तयार गर्न आयोजना निर्माण गर्दा प्राकृतिक, भौतिक, जैविक, सामाजिक, साँस्कृतिक र आर्थिक प्रणालीमा पर्ने प्रभाव यकिन गरी राय तथा सुझाव पेश गर्न प्रभावित क्षेत्रका स्थानीयबासी र सम्बिन्धत सराेकारवाला समक्ष कम्पनीले आग्रह गरेकाे छ ।
कम्पनीले सूचना सार्वजनिक गरी प्रभावित क्षेत्रका नगरपालिका, गाउँपालिका, वडा कार्यालय, विद्यालयमा अस्पताल, स्वास्थ्य चौकी तथा सरोकारवाला व्यक्ति तथा संस्थाबाट लिखित राय सुझाव मागेकाे हो । सम्बन्धित स्थानीय सराेकारवाला सबैले अबकाे ७ दिनभित्र प्राप्त हुने गरी लिखित राय तथा सुझाव पेश गर्नु पर्नेछ ।
अध्ययन अनुसार पासाङल्हामु गाउँपालिका–१ स्थित दूधकोसी नदीमा ३३ मिटर लम्बाई र १०.५ मिटर उचाईको बाँध निर्माणको प्रस्ताव गरिएको छ ।बाँधमा २ वटा इन्टेक गेट निर्माण गरिनेछ ।
नदीको पानी विद्युतगृहसम्म पुर्याउन १०.९६ किलोमिटर मुख्य सुरुङ निर्माण गरिनेछ । ३०८ मिटर लामो पेनस्टक पाइप राखिने डिजाइन छ ।विद्युतगृहबाट विद्युत उत्पादन भई निकास हुने पानी पुनः दूधकाेसी नदीमा पुर्याउन ५३० मिटर लामो ५.६ मिटर चौडाइ र ५.६ मिटर उचाई भएको टेलरेस सुरुङ निर्माण गरिने कम्पनीले जनाएको छ ।
आयोजना निर्माण सम्पन्न भई उत्पादन हुने विद्युत १८ किलोमिटर दुरीको तिन्ला सबस्टेसनमा लगेर जोडिनेछ । सबस्टेसनसम्म आवश्यक २२० केभी प्रसारण लाइन निर्माण गरिनेछ । आयोजनाको डिजाइन बहाव ४०.२४ घनमिटरप्रतिसेकेन्ड तथा कूल हेड ५५६.५० मिटर छ ।
आयोजना निर्माण हुँदा खुम्बु पासाङल्हामु गाउँपालिकाको वडा नम्बर १ र २, सालुदूधकुण्ड नगरपालिकाको वडा नम्बर १ तथा माप्य दूधकोसी गाउँपालिका वडा नम्बर १, २ र ७ प्रत्यक्षरूपमा प्रभावित हुनेछन् ।
