नेपाल पूर्वाधार 
काठमाडौं । संस्कृति, पर्यटन तथा नागरिक उड्डयनमन्त्री जीवनराम श्रेष्ठले पूर्वाधार विकास र पर्यटकीय क्षेत्रको संरक्षण सधै मन्त्रालयको प्राथमिकतामा रहेको बताएका छन् । सोमवार नेपाल व्यवसायिक कलाकार संघले नेपाल आर्ट काउन्सिलमा आयोजना गरेको कलाकार तथा लेखक सुरेशकुमार द्यःलाको ‘सत्यम शिवम् सुन्दरम्’ नामक पुस्त विमोचन एवं चित्रकला प्रदर्शनी कार्यक्रमको उद्घाटन कार्यक्रममा सम्बोधनका क्रममा यस्तो बताएका हुन् ।
नेपाली कलासंस्कृति पर्यटन विकासको प्रमुख आधार भएको बताउँदै श्रेष्ठले कला क्षेत्रको विविध सौन्दर्यले नेपाललाई अन्तर्राष्ट्रिय जगतमा परिचित गराउने बताए । ‘नेपाली कला–संस्कृतिको संरक्षण तथा प्रवद्र्धन मन्त्रालयको प्राथमिकतामा छ,’ उनले भने, ‘पर्यटकीय क्षेत्रको संरक्षण र पूर्वाधार विकास कार्यलाई सधैं महत्त्व दिएर अगाडि बढाउने छु ।’
मन्त्री श्रेष्ठले संस्कृतिको संरक्षण र प्रचार–प्रसारलाई योजना बनाएर अघि बढाइएको पनि बताए । उपत्यकाको पर्यटन विकास तथा प्रवद्र्धन गर्न सम्पदामार्ग निर्माणको प्रक्रिया अगाडि बढेको जानकारी दिए ।
उपत्यकाको सांस्कृतिक चाडपर्व र सम्पदाहरू पर्यटकीय आकर्षणका दृष्टिले महत्त्वपुर्ण रहेको उनको भनाइ थियो । उपत्यकाको सांस्कृतिक चाडपर्व र सम्पदाहरूको संरक्षण गरी यसको सांस्कृतिक विविधता प्रचार–प्रसार गर्नुपर्नेमा श्रेष्ठले जोड दिए ।
चित्र कविको परिचय बनाएका सुरेशकुमार द्यःलाले २० वर्ष लगाएर ‘सत्यम शिवम् सुन्दरम्’ कृति तयार पारेको अनुभव सुनाए । उनले सार्वजनिक गरिएको कृतिमा भगवान शिव शंकरको पुराणमा आधारित चित्रहरूमार्फत शिवको महिमा पुस्तकमा चित्रण गरिएको छ । कार्यक्रममा कलाकार मदन चित्रकारलाई सम्मान समेत गरिएको थियो ।
