नेपाल पूर्वाधार 
जनकपुरधाम। मधेस प्रदेशमा विद्युत् चुहावट घट्दै गएको छ । चालु आर्थिक वर्ष २०८३/८४ को पहिलो दुई महिनामा गत आवको सोही अवधिको तुलनामा विद्युत् चुहावट १.६१ प्रतिशतले घटेको नेपाल विद्युत् प्राधिकरण मधेस प्रदेश प्रादेशिक कार्यालयले जनाएको छ ।
गत आवको साउन-भदौमा २२.५६ प्रतिशत रहेको चुहावट चालु आवको सोही अवधिमा २०.९५ प्रतिशतमा झरेको हो । हुकिङ नियन्त्रण, बिलिङ तथा मिटर रिडिङमा सुधार र लामो समयदेखि बन्द रहेका मिटर परिवर्तन लगायतका कारण चुहावट घटेको प्राधिकरणले जनाएको छ ।
यस अवधिमा विद्युत् महसुल नतिर्ने ८ हजार ७८२ ग्राहकको लाइन काटिएको छ । तीमध्ये ८ हजार २३४ ग्राहकले पुनः जडान गराएका छन् । उनीहरूबाट २० करोड ९ लाख ७७ हजार रुपैयाँ बक्यौता असुल भएको प्राधिकरणले जनाएको छ ।
मधेसमा सबैभन्दा कम चुहावट बाराको सिमरा वितरण केन्द्रमा २.९४ प्रतिशत र सबैभन्दा बढी रौतहटको मौलापुर वितरण केन्द्रमा ४७.७७ प्रतिशत रहेको छ ।
