नेपाल पूर्वाधार 
काठमाडौं । चौंथो संस्करणको हिमालयन हाइड्रो एक्स्पो २०२४ को करिब २५ हजार दर्शकले अवलोकन गरेका छन् । बैशाख १२ गतेदेखि सुरु भएको एक्स्पोको अन्तिम दिन शुक्रबार (बैशाख १४ गते) साँझसम्ममा यति सर्वसाधारणले अवलोकन गरेका हुन् । यसपटक ५० हजारबाट अवलोकन गराउने लक्ष्य राखिएको भएपनि लक्ष्यभन्दा आधाले मात्रै अवलोकन गरेका छन् ।
शुक्रबार साँझको समापन समारोहमा एक्स्पोमा विभिन्न प्रतिश्पर्धामा सहभागी उत्कृष्टलाई प्रमाणपत्रसहित नगद पुरस्कार प्रदान गरियो । ऊर्जासँग सम्बन्धित छोटो भिडियो प्रतिश्पर्धामा निर्भिक भण्डारी, आयुष भट्टराई र शशीशेखर थापा क्रमशः पहिलो दोस्रो र तेस्रो भए ।
यस्तै, ‘हाइड्रो प्रडक्ट एण्ड सर्भिस कम्पिटिसन’तर्फ काठमाडौं विश्व विद्यालयको विद्यार्थीको ३ समूहले उत्कृष्ट स्थान हासिल गरेका छन् । टिम ऊर्जा, ‘रुरल कम्युनिटी हिट ग्रिड सिस्टम’ र ‘प्याक्ट बेड इनर्जी स्टोरेज सिस्टम’ क्रमशः पहिलो ,दोस्रो र तेस्रो भएका छन् ।
दुवै प्रतिश्पर्धामा पहिलो हुनेलाई नगद ४४ हजार रुपैयाँ र प्रमाणपत्र प्रदान गरियो । दोस्रो र तेस्रो हुनेलाई पनि क्रमशः नगद २२ हजार रुपैयाँ तथा ११ हजार रुपैयाँ र प्रमाण पत्र प्रदान गरियो ।
स्वतन्त्र ऊर्जा उत्पादकहरूको संस्था, नेपाल (इपान) र इभेन्ट सोलुसन नेपालले संयुक्तरूपमा आयोजना गरेको चौंथो संस्करणको हिमालयन हाइड्रो एक्स्पो शुक्रबार सकिएको छ । राष्ट्रपति रामचन्द्र पौडेलले उद्घाटन गरेको एक्स्पोमा ३ दिनसम्म विभिन्न शिर्षकमा ७ वटा प्राविधिक सत्र सञ्चालन गरिएको थियो । विश्वका १२ देशकासहित १ सयभन्दा बढी स्टलहरू राखिएको थियो ।
