नेपाल पूर्वाधार 
काठमाडौं । जाजरकोट भूकम्पमा परेका समुदायलाई उद्धार र राहतमा सहयोग गर्न सोसाइटी अफ कन्सल्टिङ्ग आर्किटेक्चरल एण्ड इन्जिनियरिङ्ग फम्र्स् (स्क्याफ) नेपाल अपिल गरेको छ ।
सोमबार एक विज्ञप्ति जारी गर्दै स्क्याफ नेपालले प्रभावित क्षेत्रहरूमा सुरक्षित र स्थायी बसोबासको व्यवस्था गर्ने कार्यमा समुदायहरूलाई सल्लाह दिने र सहयोग गर्नको लागि सदस्य फर्महरुमा कार्यरत स्थानीय इन्जिनियर तथा आर्किटेक्ट एवं विज्ञहरूसंग निरन्तर सम्पर्कमा रहेको उल्लेख गरेको छ ।
स्क्याफले आफ्ना सदस्य फर्महरू र मातहतका इन्जिनियर, आर्किटेक्ट, सम्बन्धित विज्ञहरू र अन्य कर्मचारीहरुलाई जाजरकोट र रुकुम पश्चिम जिल्लाका सम्बन्धित अधिकारीहरूसँग समन्वय गरेर उद्धार र राहत कार्यमा सक्रिय रुपमा सहभागी हुन आग्रह गरेको छ ।
स्क्याफको तर्फबाट आफ्ना सामाजिक जिम्मेवारी तथा पेशागत परामर्श सेवाको माध्यमबाट प्रभावित क्षेत्रहरूमा उद्धार राहत एवं सुरक्षित र स्थायी बसोबासको व्यवस्था गर्ने कार्यमा कुनै कसर बांकी नराख्ने उल्लेख गरेको छ ।
स्क्याफले भूकम्पमा जीवन गुमाउने नागरिकहरूको आत्माको चिर शान्तिको लागि प्रार्थना गर्दैै परिवारजनमा हार्दिक समवेदना व्यक्त गरेको छ । स्क्याफले उद्धार, राहत र बसोबासको व्यवस्थामा सहयोग गर्ने सबै सरकारी र गैरसरकारी संस्थाहरुको सराहना र प्रशंसा गरेको छ ।
जाजरकोट केन्द्र बिन्दुु बनाएर गएको विनाशकारी भूकम्पको कारण १५७ जना नागरिकको मृत्यु र १९९ जनाभन्दा बढी घाइते भएको पछिल्लो जानकारी छ । यस भूकम्पले जाजरकोट र रुकुम पश्चिम जिल्लाका अनेक स्थानहरुमा घरबार र अन्य संरचनाहरू नष्ट गरेको छ ।
