नेपाल पूर्वाधार 
काठमाडौं । राष्ट्रिय योजना आयोगले १६औं आवधिक योजना तर्जुमाका लागि छुट्टाछुट्टै टोली बनाएर प्रदेशगत छलफल गर्न सुरु गरेको छ । आयोगले ७ वटै प्रदेशमा टाेली मार्फत छलफल सुरु गरेकाे हाे ।
आयोगले साेमबार मधेस प्रदेशसहितका ठाउँहरूमा छलफल गर्न लागेकाे आयोगका प्रवक्ता यमलाल भुसालले बताए । उनका अनुसार छलफलका लागि १६औं योजनाको मस्यौदाका बारेमा सबै प्रदेशमा आयोगका सदस्यको नेतृत्वमा टोली परिचालन गरिएको छ ।
कर्णाली प्रदेशमा भने प्राकृतिक विपत्तिका कारण तत्काललाई कार्यक्रम स्थगित गरिएको छ । सोह्राैं योजनाको अवधारणापत्र तथा पूर्ण दस्तावेजमाथि छलफल, सुझाव, परिमार्जन र स्वीकृतिका लागि आयोगका उपाध्यक्ष डा. मीनबहादुर श्रेष्ठका संयोजकत्वमा समिति, सदस्यको संयोजकत्वमा क्षेत्रगत उपसमिति र महाशाखा प्रमुखका संयोजकत्वमा प्राविधिक समिति गठन गरिएको छ ।
प्रदेश सरकार, स्थानीय सरकार र निजी क्षेत्रकोसमेत सुझाव सङ्कलन गरेर १६औं पञ्चवर्षीय योजना तयार पार्ने आयोगले जनाएको छ । चालु १५औं योजना यही आर्थिक वर्षसँगै समाप्त हुँदैछ ।
