नेपाल पूर्वाधार 
काठमाडौं । एसियन हाइड्रोपावर कम्पनीले साधारण सेयर निष्कासन गर्न अनुमति पाएको छ । नेपाल धितोपत्र बोर्डले बुधबार (मंसिर ७ गते) कम्पनीलाई आयोजना प्रभावित क्षेत्रका स्थानीय र सर्वसाधारणका लागि छुट्याइएकाे साधारण सेयर निष्कासनकाे अनुमति दिएकाे हाे ।
इलाममा सञ्चालित ६.२ मेगावाटको तल्लो जोगमाई जलविद्युत आयोजना प्रभावित इलामका स्थानीयबासी र सर्वसाधारणका लागि छुट्याइएको सेयर २ चरणमा निष्कासन गर्न बोर्डबाट अनुमति पाएको कम्पनीले जनाएको छ ।
बोर्डको स्वीकृति पाएसँगै अब प्रतिकित्ता एक सय रुपैयाँमा ११ करोड ८० लाख मूल्य बराबरको ११ लाख ८० हजार कित्ता साधारण सेयर निष्कासन गरी बाँडफाँड गर्ने तयारी कम्पनीले सुरु गरेको छ । कम्पनीका अनुसार पहिलो चरणमा आयोजना प्रभावित क्षेत्रका स्थानीयबासीका लागि छुट्याइएको साधारण सेयर निष्कासन गरी बाँडफाँड गरिनेछ ।
प्रभावित क्षेत्रका स्थानीयका लागि ३ लाख ४० हजार कित्ता साधारण सेयर छुट्याइएको छ । बाँकी ८ लाख ४० हजार कित्ता सर्वसाधारणका लागि निष्कासन गरी बाँडफाँड गरिने कम्पनीले जनाएको छ । कम्पनीका अनुसार सेयर निष्कासनका लागि केही दिनमै सूचना सार्वजनिक गरी सर्वसाधारमा जानकारी दिइनेछ ।
कम्पनीले सेयर निष्कासन तथा बाँडफाँड गर्न एनएमबी क्यापिटललाई बिक्री प्रबन्धक तोकेको छ । कम्पनीले प्रवर्द्धन गरेकाे तल्लो जोगमाई जलविद्युत आयोजनाले २०७८ कात्तिक १५ गतेदेखि व्यापारिक विद्युत उत्पादन गर्दै आइरहेकाे छ ।
एसियन हाइड्रोपावर ऊर्जा डेभलपर्स कम्पनीको सहायक कम्पनी हो । ऊर्जा डेभलपर्स र यसका सहायक कम्पनी मिलेर सन् २०३० सम्ममा १ हजार मेगावाट विद्युत उत्पादन गर्ने लक्ष्य छ ।
