नेपाल पूर्वाधार 
काठमाडौं । काठमाडौंको बूढानीलकण्ठस्थित चपली सबस्टेसनमा जडित पावर ट्रान्सफर्मरमा समस्या आउँदा त्यस क्षेत्रको विद्युत आपूर्ति अवरुद्ध भएको छ । बुधबार बिहान ५ बजेदेखि सबस्टेसनमा जडित पावर ट्रान्सफर्मरमा समस्या आउँदा विद्युत आपूर्ति अवरुद्ध हुन पुगेको हो ।
सबस्टेसनमा जडित १०/१० एमभिएका ३ वटा पावर ट्रान्सफर्मरमध्ये एउटामा सबस्या आएको नेपाल विद्युत प्राधिकरण महाराजगन्ज वितरण केन्द्र प्रमुख प्रज्वलमान श्रेष्ठले बताए । उनका अनुसार ट्रान्सफर्मरमा समस्या आउँदा टोखा, मण्डीखाटार, बाँसबारी, धापासी हाइट, बूढानीलकण्ठ, तारेभीर, झोरलगायतका क्षेत्रमा विद्युत सेवा अवरुद्ध भएको छ ।
ट्रान्सफर्मरबाट ५ वटा फिडर सञ्चालनमा रहेकोमा सबै फिडरको सेवा बिहानैबाट अवरुद्ध छ । श्रेष्ठले सम्भव भएका स्थानमा अन्य सबस्टेसनबाट वैकल्पिक व्यवस्था गरी विद्युत आपूर्ति गरिएको बताए ।
समस्या देखिएको ट्रान्सफर्मरलाई हटाएर जगेडामा रहेको ट्रान्सफर्मर जडान गर्ने कार्य अहिले भइरहेको पनि उनले जानकारी दिए । नयाँ ट्रान्सफर्मर जडान जतिसक्दो छिट्टो सम्पन्न गरी विद्युत आपूर्ति सुचारु गर्न टोली परिचालित भएको वितरण केन्द्रले जनाएको छ ।
