नेपाल पूर्वाधार 
काठमाडौं । प्रधानमन्त्री पुष्पकमल दाहालले हरित हाइड्रोजनको पछिल्लो प्रगतिकाबारेमा विज्ञहरूसँग छलफल गरेका छन् । प्रधानमन्त्री दाहालले काठमाडौं विश्व विद्यालयका विज्ञहरूलाई बोलाई हरित हाइड्रोजनको क्षेत्रमा भइरहेको प्रगति र नेपालले उत्पादन गर्न सक्ने सम्भावनाबारे परामर्श गरेका हुन् ।
प्रधानमन्त्री दाहालले काठमाडौं विश्व विद्यालयको हरित हाइड्रोजन ल्याब प्रमुख एवं सहप्राध्यापक विराजसिंह थापासहितको टोलीसँग आफ्नो अमेरिका र चीनको उच्च स्तरीय भ्रमणमा हरित पूर्वाधार विकास तथा नवीकरणीय स्वच्छ विद्युत व्यापारको विषयलाई मुख्य एजेन्डाकोरूपमा पेश गर्ने प्रतिबद्धता जनाए । भेटमा नेपालमा हरित हाइड्रोजनको व्यापारिक उत्पादनका लागि नीति जारी हुने प्रक्रियामा रहेको जानकारी दिएको थापाले जानकारी दिए ।
उनले हरित हाइड्रोजन उत्पादनको सम्भाव्यता अध्ययनका लागि वित्तीय स्रोत व्यवस्थापन गर्ने तथा नेपालको औद्योगिक क्षेत्रमा हरित हाइड्रोजनको उपयोग बढाउन प्रवर्द्धन गर्ने आश्वान प्रधानमन्त्री दाहालले दिएको पनि बताए ।
देशभित्र जलविद्युत उत्पादन बढ्दै गइरहेको र विश्वले पनि नेपाललाई हरित हाइड्रोजन उत्पादनको हबका रूपमा हेर्न थालिसकेका बेला प्रधानमन्त्रीबाट चासो दिएर यसबारेमा बुझ्नु यो क्षेत्रका लागि सकारात्मक संदेश भएको थापाको भनाई छ ।
काठमाडौं विश्व विद्यालयले गरेको अध्ययन अनुसार विद्युत महसुलमा सहुलियत दिएको खण्डमा हरित हाइड्रोजनको व्यापारिक उत्पादन गर्न आर्थिक रूपले सम्भाव्य देखिएको छ ।
