नेपाल पूर्वाधार 
भोजपुर । भोजपुर जिल्लाकै दुर्गम मानिने साल्पासिलिछो गाउँपालिकाका ३८ सामुदायिक विद्यालयमा ‘ब्रोडब्याण्ड इन्टरनेट’ सामग्री वितरण थालिएको छ । सामुदायिक विद्यालयमा प्रविधिमैत्री शिक्षामा जोड दिन इन्टरनेट सेवा विस्तार कार्य शुरु भएको छ ।
यहाँका ४४ विद्यालयमध्ये पहिलो चरणमा ३८ विद्यालयमा इन्टरनेट विस्तारको काम थालिएकोे गाउँपालिका शिक्षा शाखा प्रमुख थानेश्वर गुरागाईंले बताए। यहाँका छ माध्यमिक विद्यालयमा भने यसअघि नै इन्टरनेट सेवा विस्तार भइसकेको छ । दोस्रो चरणमा यी विद्यालयको पनि इन्टरनेटको थप क्षमता विस्तारलगायत काम गर्ने लक्ष्य रहेको उनले बताए ।
नेपाल दूरसञ्चार प्राधिकरण र साल्पासिलिछो गाउँपालिकाबीच भएको सम्झौताअनुसार यहाँका विद्यालयमा इन्टरनेट सेवा विस्तार थालिएको हो । गाउँपालिकाका प्रमुख प्रशासकीय अधिकृत माधवकुमार अधिकारीका अनुसार प्राधिकरणले प्रत्येक विद्यालयमा २० एमबीपीएस नन डेडीकेडेट सेवा विस्तार गर्नेछ ।
गाउँपालिकाभित्रका विद्यालयमा प्रविधिमैत्री शिक्षामा जोड दिन योजनाबद्धरुपमा कामको थालनी गरिएको प्रशासकीय अधिकृत अधिकारीले बताए । विद्यालयमा सूचना प्रणालीको विकास गर्न राष्ट्रिय योजना आयोगबाट आउने ९७ लाख रुपैयाँ विशेष अनुदानको बजेटबाट थप काम गर्ने उनले बताए । “जिल्लाकै विकट मानिने हाम्रो गाउँपालिकामा प्रविधिमैत्री शिक्षाको विकासमा जोड दिएका छौँ”, प्रशासकीय अधिकृत अधिकारी भन्छन् । सवै विद्यालयमा इन्टरनेट सेवा विस्तारको काम थालेका अनि आफूहरुको मुख्य लक्ष्य सामुदायिक विद्यालयलाई प्रविधिमैत्री बनाउनु भएको पनि उनले बताए ।
सामुदायिक विद्यालयमा इन्टरनेट सेवा विस्तारले बालबालिकालाई नवीनतम र प्रविधियुक्त शिक्षा लिन सहज हुने गाउँपालिका अध्यक्ष दौलथ कुलुङ बताउँछन् । प्रविधिको विस्तारले शिक्षाको गुणस्तरमा सुधार ल्याउन भूमिका खेल्ने अध्यक्ष कुलुङको भनाइ छ । “नेपाल दुरसञ्चार प्राधिकरणसँगको सहकार्यमा ३८ वटा विद्यालयमा गुणस्तरीय इन्टरनेट सेवा विस्तार थालेका छौँ”, अध्यक्ष कुलुङले भने ।
सम्झौताअनुसार प्राधिकरणले एक विद्यालयमा पहिलो वर्ष ७३ हजार नौ सय रुपैयाँका दरले २८ लाख आठ हजार नौ सय रुपैयाँ बराबरको इन्टरनेट सेवा प्रदान गर्नेछ । त्यस्तै दोश्रो वर्षमाप्रति विद्यालय १८ हजार नौ सय रुपैयाँका दरले सात लाख आठ हजार दुई सय रुपैयाँ बराबरको इन्टरनेट सेवा प्रदान गर्ने गाउँपालिकाको भनाइ छ ।
