नेपाल पूर्वाधार 
काठमाडौ । नेपाल विद्युत प्राधिकरणले बुधबारको मध्यरातपछि ३९ मेगावाट बिजुली भारतमा निर्यात सुरु गरेको छ । वर्षा सुरु भएसँगै विद्युत उत्पादन वृद्धि हुँदै गएपछि प्राधिकरणले भारतमा बिजुलीको निर्यात सुरु गरेको हो । पहिलो चरणमा निर्यात भएको बिजुली त्रिशुली र देवीघाटको बिजुली विद्युत केन्द्रबाट उत्पादित बिजुली हो ।
विद्युत प्राधिकरणका प्रवक्ता शुरेस भट्टराईले त्रिशुली र देवीघाटबाट उत्पादित ३९ मेगावाट बिजुली निर्यात सुरु गरिएको र उत्पादन बढ्दै गएपछि थप बिजुली निर्यातको लागि तयारी अघि बढाएको जानकारी दिए । उनका अनुसार, ६.२७ भारतीय अर्थात नेपाली १० रुपैयाँमा बिजुली बिक्री भएको हो ।
जुन मुल्यको हिसाबले राम्रो हो तर भारतको ऊर्जा बजार (आईआईएक्स) मा हरेक १५–१५ मिनेटमा बिजुलीको भाउ स्वचालित तवरले तोकिने हुनाले मुल्य भने फरक फरक पर्न सक्छ ।
चालु बर्षामा ३६४ मेगावाटसम्म विद्युत निर्यातको लक्ष्य राखेकोमा पहिलो चरणमा ३९ मेगावाट निर्यात सुरु गरिएको र दुई सय मेगावाटका लागि तत्काल प्रतिपष्र्धा गर्न लागिएको प्राधिकरणले जनाएको छ ।
हालसम्म नेपालमा २२ सय मेगावाट विद्युत उत्पादन भएको छ भने माग भने साढे १६ सय मेगावाट छ । प्राधिकरणले चालु वर्षामा पाँच सय मेगावाटसम्म बिजुली खेर जाने जनाएको छ तर भारतसँग बढीमा ३ सय ६४ मेगावाटसम्म बिजुली बेच्ने गरी सम्झौता भैसकेको छ ।
३६४ मेगावाट खुल्ला बजारमा प्रतिष्पर्धामा बेच्न अनुमति पाईसकेको प्राधिकरणले थप छलफल गरी कम्तीमा ६ महिनाका लागि बिजुली विक्री गर्नका लागि पहल पनि अघि बढाएको छ ।
