नेपाल पूर्वाधार 
म्याग्दी । मनसुनको समयमा हुन सक्ने बाढी, पहिरो तथा डुबानजस्ता प्राकृतिक विपद्को जोखिमलाई मध्यनजर गर्दै म्याग्दीको बेनीमा विपद् प्रतिकार्य अभ्यास तथा प्रदर्शन गरिएको छ ।
बेनीस्थित म्याग्दी नदीमा आयोजित उक्त अभ्यासमा नेपाली सेना, नेपाल प्रहरी र सशस्त्र प्रहरी बलको संयुक्त टोलीले विपद्का बेला गरिने उद्धार तथा खोज कार्यको डेमो प्रदर्शन गरेको हो ।
मनसुन सुरु हुनुअघि सुरक्षा निकायबीच समन्वय, तयारी तथा प्रतिकार्य क्षमताको परीक्षण गर्ने उद्देश्यले कार्यक्रम आयोजना गरिएको जनाइएको छ । अभ्यासका क्रममा बाढीमा फसेका व्यक्तिलाई डुंगाको सहायताले सुरक्षित स्थानमा पुर्याउने, डोरीको प्रयोग गरी उद्धार गर्ने, तथा घाइतेलाई प्राथमिक उपचारसहित सुरक्षित स्थानसम्म लैजाने अभ्यास गरिएको थियो ।
त्यसैगरी पहिरो तथा डुबान प्रभावित क्षेत्रमा उद्धार टोली कसरी परिचालन हुन्छ भन्ने प्रक्रिया पनि प्रदर्शनमार्फत देखाइएको थियो । कार्यक्रममा आधुनिक उद्धार सामग्री तथा उपकरणको प्रयोगसमेत गरिएको थियो ।
सुरक्षा निकायका अधिकारीहरूले मनसुनको समयमा नदी किनार तथा पहिरो जोखिमयुक्त क्षेत्रमा विशेष सतर्कता अपनाउन सर्वसाधारणलाई आग्रह गरेका छन् । उनीहरूले विपद्का बेला अफवाहभन्दा आधिकारिक सूचनामा विश्वास गर्न तथा आवश्यक परे तत्काल सुरक्षा निकायलाई जानकारी गराउन अनुरोध गरेका छन् ।
हरेक वर्ष मनसुनजन्य बाढी, पहिरो र डुबानका कारण जनधनको क्षति हुने भएकाले पूर्वतयारीस्वरूप यस्ता अभ्यासलाई महत्वपूर्ण मानिएको छ । स्थानीयवासी तथा सरोकारवाला निकायको उपस्थितिमा गरिएको उक्त प्रदर्शनले विपद् व्यवस्थापनमा सुरक्षा निकायको तयारी र क्षमताको झल्को दिएको छ ।
