नेपाल पूर्वाधार 
काठमाण्डौं । युके पठाईदिन्छु भन्दै ठगी गर्ने दुई अभियुक्तलाई प्रहरीले पक्राउ गरेको छ।
काठमाडौं जिल्ला प्रहरी कार्यालयबाट खटिएको टोलीले मिति २०८२ जेठ २५ गते काठमाडौं महानगरपालिका–३२, नरेफाँट क्षेत्रबाट लक्ष्मण पराजुली र अरुण राज शर्मालाई पक्राउ गरेको छ।
प्रारम्भिक अनुसन्धानका क्रममा उनीहरुले हालसम्म ३८ जना पीडितलाई युके पठाइदिने भन्दै झुटा आश्वासन दिएर रु ११ करोड ६ लाख ९७ हजार बराबरको रकम ठगी गरेको खुलेको प्रहरीले जनाएको छ।
महेश लिम्बुको जाहेरीका आधारमा नेपाल सरकार वादी र लक्ष्मण पराजुलीसहित प्रतिवादी रहेका उक्त प्रकरणमा वैदेशिक रोजगार विभाग, ताहाचल काठमाण्डौंबाट व्यक्तिहरूलाई पक्राउ गरी उपस्थित गराउन अनुरोध गर्दै पठाइएको पत्र प्राप्त भएसँगै आवश्यक अनुसन्धान प्रक्रिया अघि बढाइएको थियो ।
पक्राउ परेका दुवै जनालाई मिति २०८२ जेठ २६ गते थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल काठमाण्डौमा बुझाइएको छ।
