नेपाल पूर्वाधार 
काठमाडौं । बाढीको कारण २ वर्ष अघिदेखि अनियमित बनेको बहुप्रतिक्षित मेलम्ची खानेपानी आयोजनाको काम अझै सहज बन्न सकेको छैन । बर्खाको समयमा मेलम्ची खोलामा निरन्तर आइरहने बाढीले आयोजनाको काम बिथोलिदै आएको छ । मेलम्ची आयोजना अघि बढाउन थप अन्योल भइरहेको बेला आयोजनाको मुहान क्षेत्र नै सार्ने विकल्पको तयारी भइरहेको मेलम्ची खानेपानी विकास समितिका सहप्रवक्ता राजेन्द्र पन्तले जानकारी दिए ।
‘मेलम्ची खानेपानी आयोजना मुहानको लागि दीर्घकालीन समाधान खोज्नुको विकल्प हामीसँग भएन । मुहान क्षेत्र सार्नु पर्ने अध्ययनले देखाएको छ ।’ उनले भने । सहप्रवक्ता पन्तका अनुसार बाढीपछि एसियाली विकास बैंक (एडिबी)ले अध्ययन गरिसकेको छ । तर, अन्तिम प्रतिवेदन अझै आइसकेको छैन ।
‘एडिबीले सर्भेको क्रममा मुहान क्षेत्र ४ सय मिटर माथि सार्नु पर्ने भनेको छ ।’, उनले भने–‘मुहान नयाँ ठाउँमा सार्दा नयाँ सुरुङ र सडक खन्नु पर्ने, पहिरो नियन्त्रणको लागि काम गर्नु पर्ने हुन्छ ।’ यी कामहरु गर्न आयोजनालाई थप २ अर्ब रुपैयाँ बजेट चाहिने अनुमान गरिएको छ । मुहान क्षेत्रमाथि सार्दा ५ सय मिटर सुरुङ खन्नु पर्ने देखिएको आयोजनाले जनाएको छ ।
यति मात्र होइन, हालको मुहानभन्दा माथि मुहान क्षेत्र सार्दा लाङटाङ राष्ट्रिय निकुञ्जको क्षेत्र पर्ने भएकोले आयोजनाको काममा ढिलाई हुन सक्ने आयोजना अधिकारीहरुको भनाइ छ । निकुञ्ज क्षेत्र परेको स्थानमा रुख हटाउन झण्झटिलो र प्रकृयाले लामो समय लिने भएकाले काममा ढिलाइ हुने सम्भावना छ । आयोजनाका सहप्रवक्ता पन्तले निकुञ्जको ठाउँमा मुहान क्षेत्र परेको खण्डमा ढिलाई हुन नदिन सम्बन्धित निकायसँग सहजीकरण गरिने बताए ।
यसअघि २०७८ असारमा मेलम्ची खोलामा आएको बाढीले मेलम्ची खानेपानीको मुहान क्षेत्र, सुरुङका केही भाग, गेट लगायत भौतिक संरचना तहसनहस पारेका थियो । मेलम्ची बजार र बस्तीलाई समेत असर पुर्याएको बाढीले सडक सञ्जालसमेत बगायो । त्यसयता मेलम्ची खानेपानीको काम सडक मर्मत, सुरुङ गेट मर्मत, सुरुङबाट गेग्रान हटाउनेमा सिमित भयो । बाढी जाने बेलामा खानेपानीको मुख्य मुहान क्षेत्र (हेडवक्स) निर्माणाधिन थियो ।
