नेपाल पूर्वाधार 
काठमाण्डौं । नेपालको सबैभन्दा ठूलो इन्टरनेट सेवा प्रदायक वर्ल्डलिंकले बिट्रिस इन्टरनेशनल इन्भेष्टमेन्ट (बीआईआई) तथा डोल्मा इम्प्याक्ट फण्ड (डीआईएफ आईआई) को १ अर्ब ९८ करोड रुपैयाँको संयुक्त लगानी प्राप्त गरेको छ ।
बिट्रिस इन्टरनेशनल इन्भेष्टमेन्ट (बीआईआई), बेलायत सरकारको विकास वित्त संस्था र प्रभावकारी लगानीकर्ताबाट ८.४ मिलियन डलर अर्थात १ अर्ब ८ करोड नेपाली रुपैयाँ तथा डोल्मा इम्प्याक्ट फण्डबाट ६.९ मिलियन डलर अर्थात ९० करोड नेपाली रुपीयाँ बराबरको लगानी वर्ल्डलिंकले प्राप्त गरेको हो ।जुन इन्टरनेट क्षेत्रको सबैभन्दा ठूलो लगानी हो । सोमबार राजधानीमा आयोजित पत्रकार सम्मेलनमा याे जानकारी दिइएकाे हाे ।
सन् २०१९ को अक्टोबरमा १२ मिलियन डलर अर्थात १ अर्ब ३५ करोड नेपाली रुपैयाँ बराबरको बिट्रिस इन्टरनेशनल इन्भेष्टमेन्टबाट लगानी कम्पनीले पाईसकेको छ । यसअघिको लगानी र हालको लगानी गरी कम्पनीमा २७.२ मिलियन डलर अर्थात ३ अर्ब ३३ करोड रुपैयाँ बराबरको लगानी पुगेको छ, जुन इन्टरनेट सेवा उद्योगमा अहिलेसम्मकै सबैभन्दा उच्च हो ।
वर्ल्डलिंक ७ लाख ५० हजारभन्दा बढी ग्राहकहरु भएको सबैभन्दा ठूलो निजी क्षेत्रको इन्टरनेट सेवा प्रदायक कम्पनी हो, जसले ग्रामीण क्षेत्रलाई केन्द्रित गरी देशभर इन्टरनेट विस्तारका गतिविधिहरुलाई गति दिने कार्य गरिरहेको छ । यो देशको सबैभन्दा ठूलो रोजगार प्रदायक कम्पनी पनि हो । हाल यस कम्पनीमा ५ हजार ५ सय कर्मचारीले रोजगारी पाएका छन् । बिट्रिस इन्टरनेशनल इन्भेष्टमेन्ट र डोल्मा इम्प्याक्ट फण्डको लगानीले थप १ हजार रोजगारी सिर्जना गर्न र कर्मचारीहरुको सीप अभिवृद्धिका लागि तालिम प्रदान गर्न मद्दत गर्नेछ ।
बिट्रिस इन्टरनेशनल इन्भेष्टमेन्ट र डोल्मा इम्प्याक्ट फण्डले पनि लगानीमार्फत सीप विकास र तालिम कार्यक्रमहरु विस्तार गर्न तथा स्वास्थ्य र सुरक्षा मापदण्डको गुणरस्तर अभिवृद्धिमा प्रगति हुने अपेक्षा गरेका छन् । वर्ल्डलिंकले कर्णाली,उच्च पहाडी र कम विकसित क्षेत्रमा समेत फाइबर टु दि होम (एफटीटीएच) मार्फत सेवा दिन सफल भएको छ । साथै कम्पनीको इन्टरनेट सेवा छत्रकोट गाउँपालिका र रुरु गाउँपालिका जस्ता देशका विभिन्न ग्रामीण भागमा पुगेको छ । कम्पनीसँग हाल २० लाखभन्दा बढी होमपास (पोर्ट) को क्षमता छ ।
बिट्रिस इन्टरनेशनल इन्भेष्टमेन्ट र डोल्मा इम्प्याक्ट फण्डद्वारा प्रदान गरिएको पुँजीले इन्टरेनेट विस्तारको गतिविधिहरुलाई गति दिनेछ । वर्ल्डलिंकले साना तथा मझौला उद्यमी तथा घरपरिवारलाई भरपर्दो इन्टरनेट सेवा उपलब्ध गराउनेछ । गुणस्तरीय इन्टरनेटले उद्यमहरुको विकासलाई मात्र होइन, अन्तर्राष्ट्रिय बजारसँग पनि जोड्नेछ ।
अन्य एशियाली राष्ट्रहरुको तुलनामा, नेपालको पहुँच डिजिटल पहुँचमा कम छ, जसले समुदाय र व्यवसायको विकासमा वास्तविक चुनौतीहरु सिर्जना गरेको छ । सर्वसाधारणका लागि सस्तो र गुणस्तरीय इन्टरनेटको पहुँचमा सुधारले नेपालको आर्थिक वृद्धि र समग्र विकासमा योगदान पु¥याउनेछ । यो संयुक्त राष्ट्र संघको दिगो विकासको लक्ष्यमध्ये एक पनि हो ।
वर्ल्डलिंकका अध्यक्ष तथा प्रबन्ध निर्देशक दिलिप अग्रवाल लगानीकर्ताको विश्वासमा आँच आउन नदिने कुरामा पनि प्रतिवद्ध रहेको र यो २७ वर्षको समर्पण र दूरसञ्चार क्षेत्रमा विश्वासको परिणाम भएको बताए । ‘बिट्रिस इन्टरनेशनल इन्भेष्टमेन्ट र डोल्मा इम्प्याक्ट फण्डले देखाएको हृदयपूर्ण सहायताले वर्ल्डलिंकलाई अन्तर्राष्ट्रिय स्तरको कम्पनीमा रुपान्तरण गर्ने लक्ष्य राखेको छ’ उनले भने ।
उनले यो साझेदारीले ‘जुनसुकै बेला र जहाँ पनि जडान’ गर्ने कम्पनीको उद्देश्यलाई अभिप्रेरित गरेको र नेटवर्कको विस्तारका लागि गति दिन थप उत्साह प्रदान गरेको उल्लेख गरे ।
बिट्रिस इन्टरनेशनल इन्भेष्टमेन्टका प्रविधी र टेलिकमका प्रबन्ध निर्देशक तथा प्रमुख अभिनव सिन्हाले अनुभवी संस्थापक र व्यवस्थापन टोलीको नेतृत्वमा वर्ल्डलिंकको विस्तार र प्रभावबाट प्रभावित भईरहेको बताए । ‘हामीले सन् २०१९ देखि कम्पनीमा लगानी गरेसँगै उनीहरुले हजारौ घरपरिवार र व्यवसायहरुलाई इन्टरनेटमा जोड्दै उनीहरुको पहुँचमा उल्लेखनीय वृद्धि गरेका छन’ उनले भने । दोस्रो लगानीले वर्ल्डलिंकलाई नेपालमा भरपर्दो र सस्तो इन्टरनेट सेवाको साथमा पुग्न कठिन क्षेत्रमा थप प्रवेश गर्न, थप रोजगारी र स्थानीय अर्थतन्त्रमा वृद्धिलाई प्रोत्साहन गर्ने अवसरहरु सिर्जना गर्न सहयोग गर्ने विश्वास व्यक्त गरे ।
नेपालका लागि बेलायती राजदूत निकोला पोलिटले ‘बिट्रिस इन्टरनेशनल इन्भेष्टमेन्टले विश्वव्यापी रुपमा इन्टरनेट पहुँच प्रदान गर्न प्रयासरत रहेको वर्ल्डलिंकलाई आफ्नो समर्थन जारी राखेको देख्दा म खुसी लागेको बताइन् । ‘नेपालमा दिगो आर्थिक विकासका लागि डिजिटल रुपान्टरण एक प्रमुख कारक हो र यस क्षेत्रका घर परिवार र व्यवसावहरुलाई समर्थन गर्नेजस्ता लगानीहरु महत्वपूर्ण छन्’ उनले भनिन् ।
डोल्मा फण्ड म्यानेजमेन्टका संस्थापक र प्रमुख कार्यकारी अधिकृत प्राध्यापक टिम गोचर ओबीईले छोटो अवधिको आर्थिक फड्को मार्ने नेपालको सबैभन्दा राम्रो मौका भनेको डिजिटल उद्योग भएकोमा जोड दिए । ‘हामीले हाम्रो प्रविधि लगानीमा असाधारण वृद्धि देखेका छौ, एआई सेवाहरुमा मात्र ५ हजार भन्दा बढी नेपालको लागि गुणस्तरीय रोजगारी छ । तर यी कामहरु मुख्यतया सहरी क्षेत्रहरुमा सीमित छन्’ उनले भने ।
उनले जहाँ ब्रोडब्यान्ड छिटो र अधिक विश्वसनीय छ, वर्ल्डलिंकमा हाम्रो लगानी, कम्पनीको साझेदारी बिट्रिस इन्टरनेशनल इन्भेष्टमेन्टसँगसँगै रोजगारीहरुलाई थप क्षेत्रहरुमा पुग्न सक्षम बनाउने हुने उनको भनाइ छ । यसले गर्दा स्वास्थ्य, शिक्षा, वित्तिय र व्यापारदेखि व्यापार सेवाहरुमा राम्रो पहुँचका साथै विश्वव्यापी डिजिटल अर्थतन्त्रमा व्यापक सहभागिता हुनेछ ।
