नेपाल पूर्वाधार 
कालीगण्डकी करिडोरको बेनी-जोमसोम-कोरला सडक, फाइल तस्बिर।
म्याग्दी। बाढीपहिरोका कारण अवरुद्ध चीन जोड्ने कालीगण्डकी करिडोरको बेनी-जोमसोम-कोरला सडकअन्तर्गत म्याग्दीको कुनौटा भीरमा मार्ग छिचोलिएको छ ।
रघुगङ्गा गाउँपालिका-२ स्थित कुनौटामा असोज ११ गते कालीगण्डकी नदीको बाढीले करिब २५० मिटर सडक बगाएको थियो । चार दिनको प्रयासपछि दुईतर्फबाट सडक जोडिएको र अब सवारीसाधन सञ्चालनयोग्य बनाउन एक-दुई दिन लाग्ने सडक योजनाले जनाएको छ ।
बाढीपहिरोले बेनी-जोमसोम-कोरला सडकका ५५ स्थानमा क्षति पुर्याएको थियो । सडक मर्मतका लागि १५ ओटा एक्साभेटर, १२ ओटा टिपर र १५ ओटा लोडरसहितका उपकरण परिचालन गरिएको छ ।
सडक विभागका अनुसार बाढीपहिरोबाट करिब ८० देखि ९० करोड रुपैयाँको क्षति भएको छ। कोरला नाका हुँदै हुने व्यापार तथा मुस्ताङको स्याउ, भेडाच्याङ्ग्रा र पर्यटनलाई ध्यानमा राख्दै सडक छिटो सञ्चालनमा ल्याउने प्रयास भइरहेको छ ।
