नेपाल पूर्वाधार 
काठमाडौं । काठमाडौंका विभिन्न सञ्चारगृह र व्यावसायिक क्षेत्र बाहिर शंकास्पद रूपमा छाडिएका सवारीसाधन भेटिएपछि सुरक्षा निकाय उच्च सतर्कतामा पुगेको छ।
कान्तिपुर मिडिया ग्रुपको कार्यालय अगाडि राखिएको एउटा गाडीलाई प्रहरीले क्रेन प्रयोग गरेर हटाएको छ। त्यसैगरी, अनामनगरस्थित भाटभटेनी सुपरमार्केट अगाडि बिहान करिब ७ बजेदेखि राखिएको अर्को गाडीको धनीको खोजी भइरहेको प्रहरीले जनाएको छ।
यसैबीच, अनलाइनखबर र हिमालय टेलिभिजनको गेट बाहिर पनि सवारीसाधन अलपत्र अवस्थामा राखिएको पाइएको छ। ती सवारीसाधन कसले र किन त्यहाँ छाडेको भन्ने विषयमा प्रहरीले अनुसन्धान गरिरहेको छ।
शंकास्पद रूपमा छाडिएका सवारीसाधनका कारण ती क्षेत्रमा केहीबेर सुरक्षा सतर्कता बढाइएको थियो। प्रहरीले सवारीधनीको पहिचान गर्ने र घटनाको वास्तविकता पत्ता लगाउने काम भइरहेको जनाएको छ।
घटनास्थलका तस्बिरहरू नेपाल फोटो लाइब्रेरीले सार्वजनिक गरेको छ।
