नेपाल पूर्वाधार 
काठमाडौं । भीषण वर्षासँगै आएको बाढीले उत्तरी भोजपुरमा निर्माणाधीन २ जलविद्युत आयोजनामा जन–धनको ठूलो क्षति भएको छ । बुधबार रातिको भीषण वर्षाले खोला थुनिएपछि आरती पावर कम्पनीले निर्माण गरिरहेको १४.५ मेगावाटको अप्पर इर्खुवा खोला र ४.३ मेगावाटको फेदीखोला जलविद्युत आयोजनामा जन–धनको क्षति हुन पुगेको हो ।
पहिरोले थुलुङ (लाहुरे) खोला थुनिएर फुटेपछि एक्कासि ठूलो बाढी आउँदा मध्यराति निर्माणाधीन आयोजनाको संरचना र त्यहाँ कार्यरत कामदारलाई बगाएको छ । बाढीले इर्खुवा आयोजनामा कार्यरत कामदार श्याम चौधरी र रमेश चौधरीलाई बगाएकोमा एक जनाको सव भेटिएको छ । अर्का एक जना अझै बेपत्ता छन् । अर्का कामदार रामकुमार चौधरीलाई करिब १ किमि तल घाइते अवस्था भेटिएको आयोजनाले जनाएको छ ।
घटनामा एक स्थानीय महिलाको समेत मृत्यु भएको खबर छ । बाढीमा बगेर बेपक्ता भएका कामदारको खोजी कार्य भइरहेको आयोजनाले जनाएको छ । बेपत्ताको उद्धारमा स्थानीयबासी, सुरक्षाकमीृ, प्रशासन, स्थानीय पालिका लागिपरेका छन् ।
यस्तै, बाढीले अप्पर इर्खुवा आयोजनामा जडान भएको ५ सय मिटर पाइप तथा कामदारको बसोबासका लागि बनाइएको आवास क्षेत्र तथा आयोजना निर्माणमा उपयोग हुने उपकरण बगाएको छ ।
यसैगरी, फेदीखोलाको करिब ७ सय मिटर पाइप एलाइन्मेन्ट तथा विद्युतगृहको सुरक्षाका लागि बनाएको संरचना एवं आवासका लागि बनाइएका केही घरहरु पनि बगाएको छ । आयोजनाका निर्माण उपकरण, मोटरसाइकल तथा स्टोर गरी राखेका सामान बगाएको आयोजनाले जनाएको छ । केही उपकरण लेदोले समेत पुरिएका छन् ।
बाढीले नागदह आसपासको बस्तीमा पनि ठूलो क्षति पुगेको छ । बाढीले सालुङ्गे पुल तथा स्थानीय क्षेत्रमा सञ्चालित लघुजलविदुत केन्द्रहरूमा पनि क्षति पूर्याएको छ ।
