नेपाल पूर्वाधार 
इलाम । जिल्लाको माइजोगमाई गाउँपालिकामा खेतीयोग्य जमिनमा सिँचाइ पुर्याउने उद्देश्यले सञ्चालित ‘साना सिँचाइ कार्यक्रम’ ले पूर्वाधार निर्माणको कामलाई तीव्रता दिएको छ । माईजोगमाईका किसानलाई सिँचाइ सुविधा पुर्याउने उद्देश्यसहित सञ्चालित कार्यक्रमअन्तर्गत एकैपटक ६ वटा सिँचाइ आयोजना सुरु भएको हो ।
चालु आर्षिक वर्षमा सम्पन्न हुने गरी ३ करोड ८३ लाख १५ हजार ६६० रुपैयाँ लागतमा ६ वटा सिँचाइ आयोजनाको काम धमाधम भइरहेको साना सिँचाइ कार्यक्रम वरिष्ठ प्राविधिक मन्दिल राईले जानकारी दिए । उनका अनुसार ड्याम र पक्की कुलो धमाधम निर्माण भइरहेको छ ।
माईजोगमाई गाउँपालिकामा सञ्चालित साना सिँचाइ कार्यक्रमअन्तर्गत वडा नं १ मा दुईवटा, वडा नं २ मा एउटा र वडा नं ५ मा तीनवटा सिँचाइ योजना निर्माण भइरहेका छन् । वडा नं १ स्थित लप्सीबोटे फलाटेगाउँमा ८९ लाख ९७ हजार रुपैयाँ लागतमा ६३ घरका किसान लाभान्वित हुने गरी लक्ष्मीखोलाबाट लप्सीबोटे फलाटेगाउँ सिँचाइ कुलो निर्माणाधीन छ ।
त्यस्तै, सोही वडाको ठूलोबेँसीमा ४२ लाख ७८ हजार ३ सय ४३ रुपैयाँ लागतमा २६ घरधुरीका किसान प्रत्यक्ष लाभान्वित हुने गरी हिलेखोलाबाट ठूलोबेँसी सिँचाइ कुलो निर्माण भइरहेको छ । वडा नं २ को राईगाउँ–लाप्चागाउँ–निगालेगाउँमा रु ५० लाख ५५ हजार ८ सय ८३ रुपैयाँ लागतमा ५८ घरका किसान लाभान्वित हुने गरी बजुर खोलाबाट सिँचाइ कुलो निर्माण सुरु भएको छ ।
वडा नं ५ को साठीमुरे बेँसीमा ३९ लाख ५८ हजार ३ सय ६६ रुपैयाँ लागतमा २६ परिवार लाभान्वित हुनेगरी ठोट्नी खोलाबाट र काफ्ले टोलमा ८२ लाख ६४ हजार २ सय ८२ रुपैयाँ लागतमा ३७ घरधुरीका किसान प्रत्यक्ष लाभान्वित हुने गरी सिँचाइ कुलो निर्माणाधीन छ ।
यसैगरी, ७७ लाख ६१ हजार ७ सय ७७ रुपैयाँ लागतमा १ सय ४८ किसान प्रत्यक्ष लाभान्वित हुने गरी सोही वडाको भुट्टेखोला थापा चावा खोला सिँचाइ कुलो निर्माणको काम तीव्र पारिएको प्राविधिक राईले बताए । आयोजना सम्पन्न भएपछि माईजोगमाईका ३ वटा वडामा बाह्रैमास पानी पुग्नेछ ।
आयोजनाले ३५८ किसानका ३ हजार ३ सय ६० रोपनी क्षेत्रमा सिँचाइ पुग्ने बताए । “वर्षौंदेखि परम्परागत कुलोबाट सिँचाइ गरिरहेका माईजोगमाईका किसान सिँचाइ आयोजना सुरु भएपछि उत्साहित भएका छन्, आयोजना सम्पन्न भएपछि यहाँका ३ हजार ३ सय ६० रोपनी क्षेत्रमा सिँचाइ सुविधा पुग्नेछ”, राईले भने, “यहाँका ३५८ घरधुरीका किसान प्रत्यक्ष लाभान्वित हुनेछन् ।”
साना सिँचाइ आयोजनामा स्वीस सरकारको १ करोड १४ लाख ९४ हजार ६ सय ९८, संघीय सरकार, प्रदेश सरकार र माईजोगमाई गाउँपालिकाको ७६ लाख ६३ हजार १ सय ३२ रुपैयाँ र स्थानीय उपभोक्ताको ३८ लाख ३१ हजार ५ सय ६६ रुपैयाँ बराबरकाे साझेदारी छ ।
यसअघिमाईजोगमाई गाउँपालिकामा ४ करोड ७० लाख ८२ हजार ८ सय २५ रुपैयाँ लागतमा ९ वटा सिँचाइ कुलो निर्माण भएका छन् । ति कुलोबाट ४ सय ८ हजार ९ सय ४० रोपनी जमिनमा सिँचाइ सुविधा पुगेको छ ।
सिँचाइ सुविधा पुगेपछि अन्नबाली, नगदेबाली तथा तरकारी बाली उत्पादन र उत्पादकत्वमा वृद्धि हुने स्थानीयको अपेक्षा छ । माईजोगमाईमा धान, मकै, गुहँलगायत अन्नबाली, अलैँची, अदुवा, आलु, अम्रिसोजस्ता नगदेबाली तथा अकबरे, मूला, काउली, काबी, बन्दा, सिमीजस्ता तरकारीको व्यावसायिक खेती हुँदै आएको छ ।
