नेपाल पूर्वाधार 
काठमाडौं । बाढी,पहिरो, भूकम्प, नाकाबन्दी तथा स्थानीय अवरोध झेल्दै निर्माण सम्पन्न भएको १०२ मेगावाटको मध्यभोटेकोसी जलविद्युत आयोजनाको संरचनाहरूको परीक्षण भइरहेको छ । चिलिमे जलविद्युत कम्पनीको सहायक मध्यभोटेकोसी जलविद्युत कम्पनीले सिन्धुपाल्चोकमा निर्माण गरेको आयोजनाको मुख्य सुरुङमा पानी भरेर परीक्षण गर्ने कार्य भइरहेको हो ।
पछिल्लो २ सातादेखि आयोजनाको सुरुङमा पानी भरेर परीक्षण गर्ने कार्य भइरहेको कम्पनीका प्रमुख कार्यकारी अधिकृत रामगोपाल सिवाकोटीले बताए । उनका अनुसार आयोजनाको ७ किलोमिटर लामो मुख्य सुरुङ परीक्षणका क्रममा एक स्थानबाट पानी चुहिने समस्या देखिएको छ ।
‘आयोजनाको भौतिक संरचना निर्माण सम्पन्न भएपछि सुरुङमा पानी पठाएर परीक्षण गरिरहेका छौं,’ उनले भने, ‘१२ दिनमा सुरुङ पूर्णरूपमा भरिनु पर्ने हो । तर, एक स्थानबाट प्रतिसेकेन्ड करिब २ लिटर पानी चुहिएको पत्ता लागेको छ । के कारणले पानी चुहिएको भन्ने थप प्रेसर दिएपछि चाहा हुनेछ ।’
उनले एक पटक सुरुङ भरिएपछि खाली गरेर पानी चुहिएको स्थानको ट्रिटमेन्ट गरी पुनः पानी भरेर परीक्षण गरिने बताए । यो काम सम्पन्न गर्न थप २ साताको समय लाग्ने पनि उनले बताए ।
दशक अघि निर्माण सुरु गरिएको मध्यभोटेकोसी आयोजना विविधि समस्या झेल्दै निर्माण सम्पन्न भएको हो । आयोजना निर्माण सम्पन्न भई परीक्षणको चरणमा रहेपनि विद्युत उत्पादन सुरु हुन भने अझै केही समय लाग्ने भएको छ ।
आयोजनाको विद्युत नेपाल विद्युत प्राधिकरणको बाह्रबिसे सबस्टेसनसम्म पुर्याउने प्रसारण लाइन तथा प्राधिकरणको सबस्टेसन निर्माणको काम बाँकी नै रहेकाले विद्युत उत्पादन सुरु हुन समय लाग्ने देखिएको हो ।
आयोजनाको विद्युतगृहदेखि बाह्रबिसे सबस्टेसनसम्म प्रवद्र्धक कम्पनीले निर्माण गरिरहेको प्रसारण लाइनको काम स्थानीयले मुआब्जा बढाउन माग गरेर अवरुद्ध पारेका छन् । प्रसारण लाइनको रुटमा पर्ने १३ वटा मध्ये ६ वटा टावरमा स्थानीयले तार तान्न दिएका छैनन् ।
स्थानीयसँग वार्ता तथा छलफल गरेर समस्या समाधानको प्रयास भइरहेको शिवाकोटीले बताए । विद्युत प्राधिकरणको प्रसारण लाइन तथा सबस्टेसनको निर्माण पूरा हुन पनि अझै २ महिनाभन्दा बढी समय लाग्ने देखिन्छ । प्रसारण प्रणालीको संरचना निर्माण सम्पन्न भएपछि मात्रै आयोजनाबाट विद्युत उत्पादन सुरु गर्न सकिने उनले बताए ।
सन् २०१४ मा निर्माण सुरु भएको आयोजना सम्पन्न हुन एक दशक लाग्दा आयोजनाको कूल लागत अनुमानितभन्दा २ अर्ब ७४ करोड ९६ लाख रुपैयाँ बढेको छ । आयोजना निर्माण सम्पन्न गर्न ब्याजबाहेक
१२ अर्ब २८ करोड ३३ लाख रुपैयाँ रुपैयाँ अनुमान गरिएको थियो । अब यो बढेर ब्याजबाहेक १५ अर्ब ३ करोड २ लाख ९० रुपैयाँ पुग्ने देखिएको छ ।
