नेपाल पूर्वाधार 
काठमाडौं । उपप्रधान तथा अर्थमन्त्री विष्णुप्रसाद पौडेल र अन्तर्राष्ट्रिय विकासका लागि अमेरिकी नियोग (युएसएआईडी) प्रमुख सामन्था पावरबीच भेटवार्ता भएको छ । हिजो मंगलबार परराष्ट्रमन्त्री डा विमला राई पौड्याललाई भेटेकी उनले आज बुधबार अर्थमन्त्री पौडेललाई भेटेकी हुन् ।
सिंहदरबारस्थित अर्थ मन्त्रालयमा भएको भेटमा उनले नेपालको अर्थतन्त्र, नेपाल र अमेरिकाबीचको सम्बन्ध बिस्तारका साथै अमेरिकी सहयोग परियोजना (एमसीसी) को कार्यान्वयनमा जोड दिएको मन्त्रालयले जनाएको छ ।
दुई दिने नेपाल भ्रमणमा मंगलबार काठमाडौं आइपुगेकी उनले आज राष्ट्रपति विद्यादेवी भण्डारी र प्रधानमन्त्री पुष्पकमल दाहालसँग पनि भेट्ने कार्यक्रम रहेको छ ।
सामन्था आजै स्वदेश फर्किने छिन् । स्वदेश फर्किनुअघि आज साँझ ५ बजे उनले पत्रकार सम्मेलन गर्नेछिन्। अमेरिकी विदेश मन्त्रालयको राजनीतिक मामिला हेर्ने उपमन्त्री भिक्टोरीया नुल्याण्डले नेपाल भ्रमण गरेर फर्किएको हप्ता दिन नपुग्दै सामन्था नेपाल भ्रमणमा आएकी थिइन्।
