नेपाल पूर्वाधार 
पर्वत । चाैधरी ग्रुपकाे लगानीमा पर्वतकाे माेदी खाेलामा निर्माण भएकाे १८ मेगावाटकाे मध्यमोदी जलविद्युत आयोजनाले यसै साताबाट व्यापारिक विद्युत उत्पादन सुरु गर्ने भएकाे छ । २ साताकाे परीक्षण उत्पादन सफल भएपछि आयोजनाबाट व्यापारिक विद्युत उत्पादन सुरु गर्ने तयारी भइरहेकाे हाे ।
२०७१ मङ्सिरदेखि निर्माण सुरु गरिएकाे आयोजना ८ वर्षमा सम्पन्न गरी विद्युत उत्पादन थालिएकाे थियाे । परीक्षण उत्पादन सफल भएकाले अब केही दिनभित्र व्यापारिक उत्पादन सुरु गर्न लागेकाे आयोजना प्रमुख प्रविन देसारले बताए ।
“३ वर्षमा आयोजना निर्माण सम्पन्न गर्ने भनेर काम थालिएको थियो, विविध समस्याका कारण लक्ष्यअनुसार काम हुन सकेन । ५ वर्ष ढिलाे गरी भएपनि आयोजना प्रसारण प्रणालीमा जाेडिएकाे छ । ”, उनले भने ।
कास्कीको अन्नपूर्ण गाउँपालिका–३ वीरेठाँटी र नजिकै पर्ने पर्वतको मोदी गाउँपालिका–१ भूकको भुरुङडाँडामा बाँध निर्माण गरेर ल्याइएको मोदीखोलाको पानी पर्वतको मोदी गाउँपालिका–२ समादीमा निर्मित विद्युतगृहमा खसारेल विद्युत उत्पादन गरिएकाे छ । माेदी खाेलाकाे पानी विद्युतगृहमा खसाल्न २.८४ किलाेमिटर लामाे मुख्य सुरुङ निर्माण गरिएकाे छ ।
पुस ५ गते अगाडि नै परीक्षणको काम सकिएकाले अब मध्यमाेदीबाट व्यापारिक उत्पादन सुरु हुन लागेकाे नेपाल विद्युत प्राधिकरण पर्वत वितरण केन्द्र प्रमुख शिवनारायण गोशलीले बताए । उनले प्राधिकरणले निशुल्क विद्युत पाउने गरीकाे १५ दिनकाे परीक्षण पूरा भइसकेकाले अब व्यापारिक उत्पादन हुन लागेकाे बताए ।
आयोजनाले उत्पादन गरेकाे विद्युत मोदी गाउँपालिकाकै पातिचौरस्थित कोरुङ्गा सबस्टेसन मार्फत राष्ट्रिय प्रसारण प्रणालीमा जाेडिएकाे छ । आयोजनाकाे विद्युत पातीचाैरमा जाेडिएकाे विद्युत पाेखराकाे लेखनाथ सबस्टेसन हुँदै लाहाचाेक सबस्टेसन पुग्नेछ ।
निर्माण सुरु गर्ने गर्दा १५.१ मेगावाट जडित क्षमता रहेकाे आयोजना निर्माणकै क्रममा स्तराेन्नति गरी १८ मेगावाट पुर्याइएकाे थियाे । सुरुमा २ अर्ब ८० करोड रुपैयाँ लागत अनुमान गरिएकाेमा आयोजना निर्माण सम्पन्न हुँदा बढेर ४ अर्ब ९२ करोड रुपैयाँ पुगेको छ ।
आयोजनाकाे निर्माण सुरु भएपछि प्रभावित क्षेत्रका स्थानीय बासिन्दाकाे पटक–पटकको आन्दोलन र विरोध तथा प्राकृतिक विपद्का कारण निर्माण लम्बिन पुगेकाे थियाे ।
२०७२ सालकाे भूकम्पको मारमा समेत परेको आयोजनाले बाढी र पहिराको पनि सामना गर्याे । पछिल्लो १ वर्षयता आयोजना निर्माण कार्यमा कुनै पनि पक्षबाट विरोध नभएका कारण कामले तीव्रता पाएको थियो ।
