काठमाडौं । नारायणघाट–मुग्लिङ सडक पछिल्लो १५ घण्टादेखि अवरुद्ध भएको छ । सोमबार राति ११ बजेदेखि अवरुद्ध भएको सडक अझ खुलाउन सकिएको छैन । यस सडकको केराबारीस्थित मौरी पुलको माथिल्लो सतहबाट लेदो बगेर जाँदा सडक अवरुद्ध भएको छ ।
‘बिहान ४ बजेदेखि सडक सफा गरिरहे पनि अझ सफल हुन सकेका छैनौ’ सडक डिभिजन भरतपुरका इञ्जिनिर सागर कार्कीले भने । मंगलबार दिउँसो १२ बजे पुन पहिरो आएपछि विहानदेखि गरेको काम समेत व्यर्थ भएको छ ।
डिभिजल कार्यालयले ४ वटा मेसिन लगाएर काम गरिरहेका छ । एउटा एक्जाभेटर, दुई वटा लोडर, एउटा जेसिबी र दुई वटा टिपर प्रयोग गरिरहेका छ ।
अहिले पनि त्यस क्षेत्रमा पानी परिरहेको छ । लगातार पानी परिरहेकाले लेदो पनि निरन्तर बगीरहेको छ ।
लेदोले पुलमुनिको भाग भरिएर अहिले पुलमाथिबाट समेत बग्न थालेको छ । ‘कतिबेला सम्ममा सडक सुचारु गर्न सकिने भन्न सकिने अवस्था छैन’ उनले भने । यसअघि सोमबार विहान ४ बजे बन्द भएको सडक ६ बजे खोलिएको थियो । त्यसकारण हिजो दिनभर सवारी सञ्चालन भएको थियो ।
फाेटाेः सडक डिभिजन भरतपुरमा कार्यरत इञ्जिनियर सागर कार्कीकाे फेसबुकबाट लिइएकाे हाे ।
