Nepal Purbadhar

सोमवार, अशोज १७, २०७९
Monday, October 3, 2022

सोमवार, अशोज १७, २०७९
Monday, October 3, 2022

लिबर्टी इनर्जीले २४.६ मेगावाटको बडिगाड खोला निर्माण गर्ने


काठमाडौं । लिबर्टी इनर्जी कम्पनीले २४.६ मेगावाटको बडिगाड खोला जलविद्युत आयोजना निर्माण गर्ने भएको छ । कम्पनीले गण्डकी प्रदेशको बागलुङ जिल्लास्थित मालिका र मुसिकोट गाउँपालिका भएर बग्ने बडिगाड खोलामा यो आयोजना निर्माण गर्न लागेको हो ।

आयोजनाको अध्ययन पूरा भइसकेको छ । कम्पनीले आयोजनाको उत्पादन अनुमतिपत्र लिन विद्युत विकास विभागमा आवेदन दिएको छ ।कम्पनीको नाममा उत्पादन अनुमतिपत्र जारी गर्ने प्रक्रिया अन्तिम चरणमा पुगेको विभागले जनाएको छ । विभागले आयोजनाको सम्भाव्यता अध्ययन प्रतिवेदन, प्रारम्भिक वातावरणीय परीक्षण प्रतिवेदन अनुसार कम्पनीलाई उत्पादन अनुमतिपत्र दिन ३५ दिने सूचना जारी गरी सम्बन्धित सरोकारवालासँग राय तथा सुझाव मागेको छ ।

आयोजना निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग लिखित राय/सुझाव मागिएको हो । कम्पनीले निर्माण गर्ने आयोजना नदीको वहावमा आधारित हुनेछ । आयोजनाको डिजाइन डिस्चार्ज (वहाव) १८.७९ घनमिटर प्रतिसेकेन्ड र कूल ग्रस हेड १५५ मिटरको हुनेछ । आयोजना निर्माण सम्पन्न भई सञ्चालनमा आउँदा वार्षिक १४७.७३ गिगावाट घन्टा विद्युत उत्पादन हुनेछ ।

आयोजनाको मुख्य भौतिक संरचना बडिगाड खोलाको वायाँ किलारमा रहने छन् । खोलाको पानी विद्युतगृहसम्म पुर्याउन ५४.७५ मिटर लम्बाई भएको बाँध निर्माण गरिनेछ । आयोजनाबाट विद्युत उत्पादनका लागि विद्युतगृहमा ८.२६ मेगावाट क्षमताका ३ वटा फ्रान्सिस टर्बाइन जडान गरिनेछ ।

विद्युत उत्पादन भइसकेपछिको पानी पुनः खोलामा फर्काउन ७ मिटर चौडाई, ३५ मिटर लम्बाई र ३ मिटर उचाईको निकाल नली निर्माण गरिनेछ ।आयोजनाबाट २०८४ साल असार १५ गतेभित्र विद्युत उत्पादन गर्ने लक्ष्य राखिएको छ ।

आयोजनाले उत्पादन गर्ने विद्युत गुल्मीको बस्तु सबस्टेसनमा जोडिनेछ । यो आयोजना निर्माण भई राष्ट्रिय प्रसारण प्रणालीमा जोडिँदा प्रणालीको गुणस्तरमा सुधार भई प्राविधिक चुहावट कम गर्न योगदान पुग्ने कम्पनीले जनाएको छ । यो कम्पनीले २५ मेगावाटको माथिल्लो दोर्दी ‘ए’ जलविद्युत आयोजना निर्माण गरेको छ । निर्माण पूरा भएको यो आयोजना विद्युत उत्पादन गर्ने चरणमा छ ।


Read Previous

जलवायु परिवर्तनले जलस्रोतको विकासमा पार्ने असर न्युनिकरणका लागि संयुक्त अध्ययन गर्न नेपाल र बंगलादेश सहमत

Read Next

लहान वितरण केन्द्रले विद्युत चुहावट २५.३९ प्रतिशतमा झार्यो

Leave a Reply

Your email address will not be published.