नेपाल पूर्वाधार 
काठमाडौं । नेपाल विद्युत प्राधिकरणलाई अनलाइनमार्फत विद्युत महसुल तिर्ने ग्राहकको संख्या १० लाख पुगेको छ । प्राधिकरणले अनलाइन महसुल भुक्तानी सुरु गरेको करिब ५ वर्षमा यति ग्राहकले यो सेवाको उपयोग गर्दै आइरहेका हुन् ।
अहिले देशभरबाट दैनिक ५ देखि ७ करोड हाराहारीमा अनलाइनमार्फत महसुल संकलन हुँदै आएको प्राधिकरण कम्प्युटराइज विल्डिङ तथा नेटवर्क महाशाख प्रमुख रबिन्द्र श्रेष्ठले बताए । उनका अनुसार ग्राहकले अनलाइनमार्फत तिर्ने विद्युत महसुल कूल महसुलको करिब ३० प्रतिशत हो ।
‘अनलाइनमार्फत विद्युत महसुल तिर्ने ग्राहकको संख्या क्रमशः बढिरहेको छ,’ उनले भने,‘इन्टरनेट र मोबाइल बैंकिङको पहुँच भएका ग्राहकले अनलाइनबाटै महसुल तिरिरहनु भएको छ । अहिले मासिकरूपमा २ अर्ब रुपैयाँसम्म अनलाइनमार्फत प्राधिकरणको महसुल उठिरहेको छ ।’ उनले अनलाइन भुक्तानी प्रणालीको अहिलेको दायरा बढाएर १ करोड रुपैयाँसम्म पुर्याउन सक्ने हो भने ठूला ग्राहक पनि थपिने बताए ।
प्राधिकरणले मासिक ५ लाखभन्दा कम महसुल उठ्ने ग्राहकका लागि अनलाइनमार्फत तिर्न मिल्ने सुविधा दिएको छ । प्राधिकरणले विद्युत महसुल अनलाइन भुक्तानी सेवा सुरु गरेको वर्ष २०७४ भदौदेखि चैतसम्म ६५ करोड रुपैयाँ संकलन भएको थियो ।
यस्तै, २०७५ सालभर (१२ महिना) मा ४ अर्ब ६० करोड रुपैयाँ संकलन भएको प्राधिकरणको तथ्यांक छ । प्राधिकरणका अनुसार २०७६ सालमा ८ अर्ब ७० करोड, २०७७ सालमा ११ अर्ब ७६ करोड रुपैयाँ, २०७८ सालमा १५ अर्ब २५ करोड रुपैयाँ संकलन भएको थियो ।
२०७९ साल सुरु भए यता ३ महिनाको अवधिमा पनि ४ अर्ब ६० करोड रुपैयाँ संकलन भइसकेको श्रेष्ठले जानकारी दिए । ५ वर्षको अवधिमा अहिलेसम्म ४५ अर्ब रुपैयाँ बढी महसुल अनलाइनबाट संकलन भएको छ ।
अहिले इ-सेवा, प्रभु बैंक, खल्ती, आइएमई पे, एनआइबिएल, फोन पेलगायत ११ वटा सेवा प्रदायकले अनलाइन विद्युत महसुल संकलन गर्दै आएका छन् । जसमध्ये ६० प्रतिशत बढी महसुल इ-सेवा एक्लैले संकलन गर्दै आइरहेको छ । सेवा प्रदायकले अनलाइनमार्फत संकलन गरेको विद्युत महसुल प्राधिकरणको बैंक खातामा जम्मा हुने गर्दछ ।
२० वितरण केन्द्रलाई इ-सेवाको सम्मान
अनलाइन भुक्तानी सेवा प्रदायक इ–सेवाले अनलाइनमार्फत विद्युत महसुल संकलन गर्ने प्राधिकरणका २० वितरण केन्द्रलाई सम्मान गरेको छ । इ–सेवाले प्राधिकरणका देशभरका १२९ वितरण केन्द्र मध्ये उत्कृष्ट २० वितरण केन्द्रका आय संकलन काउन्टर प्रमुखलाई सम्मान गरेको हो ।
इ-सेवाद्वारा सम्मानित वितरण केन्द्र र आय काउन्टर प्रमुखको नाम
| क्र.सं | वितरण केन्द्रको नाम | आय प्रमुखको नाम |
| १. | कुलेश्वर | रघुनन्दन पौडेल |
| २. | रत्नपार्क | रजनिशराज घिमिरे |
| ३. | महाराजगञ्ज | गीता तिमल्सिना |
| ४. | बानेश्वर | राजेश रिमाल |
| ५. | भक्तपुर | अनिता बन |
| ६. | बुटवल | खेमराज आचार्य |
| ७. | दमक | बालकुमारी कार्की |
| ८. | कावासोती | लालहरी उपाध्याय |
| ९. | नेपालगन्ज | सुमित्रा बोहोरा |
| १०. | पोखरा | शिव सुवेदी |
| ११. | टाँडी | माधव तिमल्सिला |
| १२. | इटहरी | समिता नेपाली |
| १३. | लेखनाथ | लोकप्रसाद काफ्ले |
| १४. | भरतपुर | खेमराज गुरुङ |
| १५. | धनगढी | देवीसरा महतरा |
| १६. | विराटनगर | सुरेन्द्र न्यौपाने |
| १७. | उर्लाबारी | हरि श्रेष्ठ |
| १८. | भैरहवा | सुनिता क्षेत्री |
| १९. | लालबन्दी | सरोज साह |
| २० | नयाँ मिल | अश्मिता ज्ञवाली |
स्राेतः नेपाल विद्युत प्राधिकरण
