Nepal Purbadhar

सोमवार, अशोज १७, २०७९
Monday, October 3, 2022

सोमवार, अशोज १७, २०७९
Monday, October 3, 2022

मध्यतमोर आयोजनाको मुख्य सुरुङ पूरा, विद्युत उत्पादन गर्न १३ महिना लाग्ने


काठमाडौं । ताप्लेजुङको तमोर नदीमा निर्माणाधीन ७३ मेगावाटको मध्यतमोर जलविद्युत आयोजनाको मुख्य सुरुङ पूरा भएको छ । सानिमा हाइड्रो समूहको सहायक सानिमा मिडल तमोर हाइड्रो पावर कम्पनीले निर्माण गरिरहेको आयोजनाको ३.७ किलोमिटर लामो सुरुङ खनेर सकिएको हो ।

गत शुक्रबार (असार ३१ गते) राति ११ बजे मुख्य सुरुङ वारपार भएको आयोजना संयोजक मणिराज पोखरेलले बताए । ‘आयोजनाको मुख्य र चुनौतीपूर्ण काम भनेको सुरुङ निर्माण नै हो । हाम्रो आयोजनाको मुख्य सुरुङ खनेर सकेका छौं,’ उनले भने, ‘यसलाई हामीले ठूलो सफलता मानेका छौं ।’

उनले खनेर सकिएको सुरुङमा अब लाइनिङ तथा कंक्रिटिङ लगायतको काम गरिने बताए । सिभिलतर्फ आयोजनाको ६७ प्रतिशत निर्माण पूरा भइसकेको पनि उनले बताए ।

अहिले बाँध, सुरुङ र विद्युतगृहको सिभिलतर्फको काम धमाधम भइरहेको छ । बाँध क्षेत्रका संरचनाको निर्माण अन्तिम चरणमा पुगेको छ । उनले बाँध क्षेत्रमा ९० प्रतिशत काम सकिएको बताए ।

विद्युतगृहमा सिभिलतर्पको करिब ७० प्रतिशत काम सकिएको छ । हाइड्रोमेकानिकल र इलेक्ट्रोमेकानिकलतर्फको काम हुन बाँकी छ । हाइड्रोमकानिकलतर्फका उपकरणहरू केही आयात भएको र बाँकीको पनि आयात हुन लागेको कम्पनीले जनाएको छ ।

यो आयोजना अबको १३ महिनामा सम्पन्न गर्ने लक्ष्य छ । आयोजना सम्पन्न गर्न करिब १३ अर्ब रुपैयाँ खर्च हुने अनुमान छ । नेपाल इन्भेष्टमेन्ट, कृषि विकास, सिदार्थ, लक्ष्मी गरी ८ वटा बैंकले आयोजनामा ऋण लगानी गरेका छन् । बाणिज्य बैंकहरूले गरेको लगानी साढे ९ अर्ब रुपैयाँ लगानी गरेका छन् ।

आयोजना निर्माण सम्पन्न भई सञ्चालनमा आएपछि उत्पादन हुने विद्युत २२० केभी कोसी कोरिडोर प्रसारण लाइनको ढुंगेसाँघु सबस्टेसनमार्फत राष्ट्रिय प्रसारण प्रणालीमा जोडिनेछ । आयोजनाको विद्युतगृहदेखि सबस्टेसनसम्मको दुरी ९ किलोमिटर छ । कोसी कोरिडोरको ढुंगेसाँघु–वसन्तपुर खण्ड निर्माणाधीन छ । तुम्लिङटार–इनरुवा खण्ड निर्माण सम्पन्न भई सञ्चालनमा आइसकेको छ ।

आयोजनाको प्रवर्द्धक कम्पनीले ढुंगेसाँघुसम्मको ९ किलोमिटर लामो प्रसारण लाइन निर्माण गरिरहेको छ । प्रसारण लाइन अन्तर्गत २४ वटा टावर निर्माण हुनेछन् । प्रसारण लाइनको रुटमा निर्माण हुने सबै टावरको जग खनेर सकिएको पोखरेलले जानकारी दिए । ३ वटा टावर समेत खडा गरिएको उनले बताए ।

सानिमा समूहको लगानीमा मध्यतमोरसँगै २८.१ मेगावाटको तल्लो लिखु, १४.३ मेगावाटको माथिल्लो मैलुङ आयोजना पनि निर्माणाधीन छन् । जसमध्ये तल्लो लिखु ९५ प्रतिशत पूरा भइसकेको छ । २२ मेगावाटको सानिमा माई, ७ मेगावाटको माई क्यासकेड, २.६ मेगावाटको सुनकोसी सानालगायत आयोजना निर्माण सम्पन्न भई सञ्चालनमा छन् ।


Read Previous

अनलाइन विद्युत महसुल तिर्ने ग्राहक १० लाख, २० वितरण केन्द्रलाई इ-सेवाको सम्मान

Read Next

विद्युत उत्पादन गर्ने १८ जलविद्युत प्रवर्द्धकलाई विभागको सम्मान

Leave a Reply

Your email address will not be published.