नेपाल पूर्वाधार 
काठमाडौं । रसुवामा निर्माणाधीन २१६ मेगावाट क्षमताको माथिल्लो त्रिशुली–१ जलविद्युत् आयोजनाको पानी प्रवाह नियन्त्रण गर्ने वेयरगेट औपचारिक रूपमा सञ्चालनमा ल्याइएको छ ।
नेपालका लागि गणतन्त्र कोरियाका राजदूत पार्क थेयङले रसुवामा आयोजित कार्यक्रममा वेयरगेट उद्घाटन गरेका हुन् । वेयरगेट सञ्चालनमा आएसँगै आयोजना निर्माण अन्तिम चरणमा पुगेको नेपालस्थित कोरियाली दूतावासले जनाएको छ ।
उद्घाटन कार्यक्रममा बोल्दै राजदूत पार्कले गणतन्त्र कोरियाले विगत ५२ वर्षदेखि नेपालको दिगो आर्थिक विकास र समृद्धिका लागि सहकार्य गर्दै आएको बताए । उनले नेपालमा कोरियाको लगानीमा तीनवटा जलविद्युत् आयोजना निर्माण भइरहेको उल्लेख गर्दै ऊर्जा क्षेत्रमा दुई देशबीच सहकार्यको ठूलो सम्भावना रहेको धारणा राखे ।
उनका अनुसार माथिल्लो त्रिशुली–१ आयोजना नेपाल र कोरियाबीच ऊर्जा क्षेत्रमा भएको दीर्घकालीन साझेदारी र लगानीको महत्वपूर्ण उदाहरण बनेको छ ।
कार्यक्रममा ऊर्जा मन्त्रालयका अधिकारी, कोरियाली दूतावासका प्रतिनिधि, आयोजनासँग सम्बन्धित निकायका पदाधिकारी तथा स्थानीयवासीको उपस्थिति रहेको थियो ।
नेपालकै सबैभन्दा ठूलो प्रत्यक्ष वैदेशिक लगानी रहेको यस आयोजनालाई सन् २०२७ को मध्यसम्म सम्पन्न गर्ने लक्ष्य राखिएको छ । आयोजनामा ७० प्रतिशत ऋण र ३० प्रतिशत इक्विटीमार्फत लगानी गरिएको छ ।
नेपाल जल तथा ऊर्जा विकास कम्पनी प्रालिद्वारा निर्माण भइरहेको आयोजनाका प्रमुख प्रवर्द्धक कोरिया साउथ इस्ट पावर कम्पनी र कोरिया ओभरसिज इन्फ्रास्ट्रक्चर एण्ड अर्बन डेभलपमेन्ट कर्पोरेशन रहेका छन् ।
आयोजनामा अन्तरराष्ट्रिय वित्त निगम (आईएफसी), एसियाली विकास बैंक (एडीबी), एसियाली पूर्वाधार लगानी बैंक (एआईआईबी) तथा कोरियाली एक्जिम बैंकलगायत अन्तरराष्ट्रिय वित्तीय संस्थाले ऋण लगानी गरेका छन् ।
