नेपाल पूर्वाधार 
चितवन । नारायणगढ-मुग्लिन सडक खण्डका थप ३ पुल यसै साता सञ्चालन आउने भएका छन् । जुगेडी, जुगेडी खहरे र सिमल ताल पुल सञ्चालन ल्याउन लागिएको हो ।
नागढुङ्गा–मुग्लिन सडक आयोजना पश्चिम खण्ड (नारायणगढ–मुग्लिन) का इन्जिनियर कृष्ण आचार्यले ३ नयाँ पुल सञ्चालनकाे तयारी भइरहेकाे बताए । उनका अनुसार यी पुलकाे पहुँचमार्गमा कालोपत्रको अन्तिम तह बाँकी छ ।
“आज र भोलि कालोपत्र सकिन्छ । पर्सीबाट पुल सञ्चालनको तयारी गरेका छौं,” उनले भने । उनले हाल भित्तो काटेर झारिएको तुइन पुलको जग निर्माण भइरहेको छ ।
मुग्लिन नजिकको खरहे पुलको ८० प्रतिशत काम सम्पन्न भएको छ । यो पुलको पहुँच सडकमा ‘वाल’ उठाएर कालोपत्र र रङरोगको काम बाँकी छ । उनले ६ महिनाभित्रमा यी दुवै पुल सम्पन्न हुने बताए ।
काली र नाम्ची दुई वटा पुल दुई महिनाभित्र सञ्चालनमा ल्याउने गरी काम भइरहेको पनि उनले बताए । यी पुलको पहुँचमार्गमा नाला, कालोपत्र र रङरोगनको काम मात्रै बाँकी रहेको आचार्यले जानकारी दिए ।
उनका अनुसार यसअघि सो सडकखण्डमा १२ वटा पुल सञ्चालनमा आइसकेका छन् । सडकखण्डमा कूल १९ पुल छन् । तीमध्ये चार वटा पहिले नै निर्माण भएका थिए ।
याे सडक खण्डमा २०७६ चैतदेखि विश्व बैंकको सहयोगमा १५ वटा पुल निर्माण थालिएको थियाे । सडक चौडा भएपछि पुल निर्माण गरिएको हो । सडक विस्तार गरी ९ मिटरदेखि ११ मिटरसम्म फराकिलो बनाइएको छ । राजधानी प्रवेशको ‘लाइफलाइन’का रुपमा यो सडकलाई लिने गरिन्छ ।
