Nepal Purbadhar

आइतवार, साउन ६, २०८१
Sunday, July 21, 2024

आइतवार, साउन ६, २०८१
Sunday, July 21, 2024

प्रसारण प्रणालीको समस्याले अवरुद्ध पूर्वका उद्योगको विद्युत आपूर्ति नियमित भइसक्योः घिसिङ


काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले प्रसारण प्रणालीको समस्याका कारण अवरुद्ध भएको मोरङ र सुनसरी औद्योगिक करिडोरका उद्योगको विद्युत आपूर्ति नियमित भइसकेको बताएका छन् । घिसिङले आइतबार पत्रकार सम्मेलन गरी एक साता अगाडि रुपनी सबस्टेसनको ब्रेकर पड्किँदा माग बमोजिमको लोड पठाउन नसक्दा ३ दिन समस्या देखिए पनि अहिले पूर्वका उद्योगको विद्युत आपूर्ति नियमित भइसकेको बताए ।

‘केही दिन यता उद्योगले माग बमोजिम विद्युत नपाएको भन्ने गुनासो आएको छ । प्रसारण प्रणालीमा आएको प्राविधिक समस्याका कारण यस्तो हुन गएको हो,’ उनले भने, ‘रुपनी सबस्टेसनको ब्रेकर बदलेर विद्युत आपूर्ति नियमित गरिसकेका छौं । हिजोदेखि नै दुहबी क्षेत्रका उद्योगले विद्युत पाएका छन् ।’

उनले काबेली र कोसी करिडोरका जलविद्युतगृहको उत्पादन कम हुँदा पनि पूर्वका उद्योगको आपूर्तिमा बेला–बेलामा समस्या देखिने गरेको बताए । सुख्खा याममा स्वदेशी उत्पादन न्यून हुँदा आयात गरेको विद्युत पनि प्रसारण लाइनको समस्याले माग बमोजिम पूर्वका उद्योगमा पठाउन नसक्ने अवस्था रहेको उनको भनाइ छ । घिसिङका अनुसार ४०० केभी ढल्केबर–मुजफ्फरपुर अन्तरदेशीय प्रसारण लाइनबाट ८ सय मेगावाटसम्म विद्युत आयात गर्न सकिने भएपनि प्रसारण लाइनको क्षमताले नधान्दा पूर्वमा पठाउन सकिएको छैन ।

‘उद्योगलाई ढल्केबर–मुजफ्फरपुर लाइनबाट आयात गरेरै भएपनि माग बमोजिम विद्युत दिनुपर्ने हो । तर, मोरङ र सुनसरीका उद्योगसम्म आयातित विद्युत पुर्याउने १३२ केभी प्रसारण लाइनले सबै लोड लिँदैन । यो वर्ष समस्या भएपनि आगामी वर्ष निर्माणाधीन ४०० केभी इनरुवा–ढल्केबर–हेटौंडा प्रसारण लाइन सम्पन्न गरेपछि हिउँदमा समेत पूर्वका उद्योगले दिगो र गुणस्तरीय विद्युत सेवा पाउने छन् । पूर्वको पावर फ्लोमा समस्या आउने छैन’, उनले भने ।

ढल्केबर–मुजफ्फरपुर प्रसारण लाइनको आयातमा समस्या नभएपनि बिहारसँगका १३२ केभी कुसाहा–कटैया र रक्सौल–परवानीपुर प्रसारण लाइनबाट आयात हुने विद्युत रोकिन थालेको समेत उनले बताए । घिसिङकाअनुसार अहिले बिहारको विद्युत माग बढेका कारण साँझ ७ बजेदेखि राति २ बजेसम्म उताबाट आउने विद्युत काटिने गरेको छ ।

रक्सौल–परवानीपुर विन्दुको आयात प्रभावित हुँदा वीरजञ्ज क्षेत्रका उद्योगमा पनि बत्ती बाल्नका लागि मात्रै विद्युत उपयोग गर्नु भन्ने अवस्था आउन लागेको बताए । उनले अब करिब २ साता विद्युत आपूर्तिमा कहीं कहीं समस्या आउने भएपनि त्यसपछि सबै उद्योगले माग बमोजिम आपूर्ति पाउने जिकिर गरे ।

प्राधिकरणका अनुसार यो वर्ष उद्योगको लोड गत वर्षकोभन्दा ५ सय मेगावाटसम्म बढेकाले पनि कहिले काहीं ट्रिपिङको समस्या देखिने गरेको छ । उनले यो वर्ष विद्युतको माग बढे पनि अहिले चरम सुख्खा याममा प्रणालीमा उपलब्ध विद्युत गत वर्षकोभन्दा न्यून भएकाले समस्या आन्तरिक उत्पादनबाट आपूर्ति व्यवस्थापनमा चुनौती आएको बताए ।

उता उद्याेगीहरू प्राधिकरणले बिना जानकारी विद्युत कटौती गरेकाे भन्दै सडकमा उत्रिएर विराेध गरिरहेका छन् । नेपाल उद्योग वाणिज्य महासंघ, नेपाल उद्योग परिसंघ, उद्योग संगठन मोरङ, मोरङ व्यापार संघलगायत नियमित विद्युत आपूर्तिकाे माग गर्दै विराेध गरिरहेका छन् ।

प्रधिकरणले औद्योगिक क्षेत्रमा बिहान ६ देखि १० बजेसम्म र बेलुका ५ देखि राति १० बजेसम्म बिना सूचना दैनिक विद्युत कटौती गरिरहेकाे उद्याेगहरूकाे  आराेप छ ।


Read Previous

साँखु-लप्सीफेदी सडक पुनर्निर्माण गरिने   

Read Next

विद्युत जडित क्षमता बढे पनि सुख्खा यामको उत्पादन गत वर्षको भन्दा न्यून

Leave a Reply

Your email address will not be published. Required fields are marked *