नेपाल पूर्वाधार 
काठमाडौं । सार्वजनिक खरिद अनुगमन कार्यालयले थप ८ निर्माण व्यवसायी तथा आपूर्तिकर्ता कम्पनीलाई कालोसूचीमा राख्ने तयारी गरेको छ । कार्यालयले पूर्वाधार आयोजना निर्माणको ठेक्का लिई समयमा जिम्मेवारी पूरा नगर्ने निर्माण व्यवसायी तथा आपूर्तिकर्ता कम्पनीलाई कालोसूचीमा राख्ने प्रक्रिया अघि बढाएको हो ।
विभिन्न सार्वजनिक निकायको सिफारिसका आधारमा पूर्वाधार आयोजना निर्माणको जिम्मा लिई काम अलपत्र छोड्ने निर्माण व्यवसायी तथा आपूर्तिकर्तालाई कालोसूचीमा राख्ने प्रक्रिया अघि बढाएको कार्यालयले जनाएको छ । कार्यालयले बुधबार सूचना प्रकाशित गरी सार्वजनिक संस्थानहरूले सिफारिस गरेका कम्पनीलाई कालोसूचीमा राख्न नपर्ने आधारसहितको लिखित स्पष्टिकरण एक साताभित्र बुझाउन भनेको छ ।
‘सार्वजनिक निकायबाट कालोसूचीमा राख्न लिखित सिफारिस आएको छ । सम्बन्धित कम्पनीले कालोसूचीमा राख्न नपर्ने आधार प्रमाणसहितको लिखित स्पष्टिकरण पठाउन ३० दिनको समय दिएर पत्राचार गरिएको थियो,’ सूचनामा भनिएको छ,‘तर, कुनै कम्पनीबाट तोकिएको अवधिभित्र लिखित जवाफ आएन । यो सूचना प्रकाशित भएको मितिले अबको ७ दिनभित्र पेश गर्न अनुरोध गरिन्छ ।’
कालोसूचीमा राख्न प्रस्तावित निर्माण तथा आपूर्तिकर्ता कम्पनीमा मकानपुरको हेटौंडास्थित गुण निर्माण सेवा, काठमाडौंको सिरुवा÷कबिर÷सुनकोसी जेभी, पर्सा जानकीटोलको मुस्कान सप्लासर्य छन् । गुणराज पाठकको स्वामित्व रहेको गुण निर्माण सेवालाई कैलालीस्थित सूदुरपश्चिम विश्व विद्यालयले कालोसूचीमा राख्न सिफासिर गरेको कार्यालयले जनाएको छ ।
कार्यालयका अनुसार सिरुवा/कबिर/सुनकोसी जेभीलाई सडक डिभिजन कार्यालय सुर्खेत तथा मुस्कान सप्लासर्यलाई पर्सास्थित जगरनाथपुर गाउँपालिकाले कालोसूचीमा राख्न सिफासिर गरेको हो ।
यस्तै, हटौंडाकै मुक्तिनाथ रुपेशश कन्स्ट्रक्सन एण्ड सप्लायर्स, काठमाडौंको बनेश्वरस्थित अनुष्ठान कन्स्ट्रक्सन, तिनकुनेको सिरुवा कन्स्ट्रक्सन, पर्सा वीरगञ्जको दिल्ली ट्रेडिङ र चितवनस्थित जय जढीमाई निर्माण कन्स्ट्रक्सन कम्पनीलाई पनि कालोसूचीमा राख्न सिफारिस परेको छ ।
मुक्तिनाथ रुपेशश कन्स्ट्रक्सन एण्ड सप्लायर्सलाई सिन्धुलीस्थित हरिहरपुरी गाउँपालिकाको कार्यालयले, अनुष्ठान कन्स्ट्रक्सनलाई भरतपुर महानगरपालिकाले तथा सिरुवा कन्स्ट्रक्सनलाई सडक डिभिजन कार्यालय पोखराले कालोसूचीमा राख्न सिफारिस गरेको सूचनामा जनाइएको छ ।
दिल्ली ट्रेडिङलाई वीरगञ्ज महानगरपालिकाको कार्यालय तथा जय जढीमाई निर्माण कन्स्ट्रक्सनलाई खैरहनी नगरपालिका कार्यालय चितवनले कालोसूचीमा राख्न सिफासिर गरेको हो । कार्यालयले हालै पनि १२ निर्माण कम्पनीलाई कालोसूचीमा राखेको थियो ।
