बाजुराका स्थानीय तहको आर्थिक अवस्था नाजुक, नौ पालिकाको बजेट ४ अर्ब ४० करोड मात्रै

बाजुरा। बाजुराका चार नगरपालिका र पाँच गाउँपालिकाले आगामी आर्थिक वर्ष २०८३/८४ का लागि कुल रु ४ अर्ब ४० करोड २३ लाख ४० हजारको बजेट सार्वजनिक गरेका छन्। बुधबार सम्पन्न नगर तथा गाउँसभामा प्रस्तुत बजेटमा शिक्षा, स्वास्थ्य, कृषि, पूर्वाधार विकास र पर्यटनलाई मुख्य प्राथमिकतामा राखिएको छ।

जिल्लाकै सबैभन्दा बढी बजेट बुढीनन्दा नगरपालिकाले रु ५७ करोड ६ लाख ९६ हजार विनियोजन गरेको छ। त्यसपछि बुढीगङ्गा नगरपालिकाले रु ५६ करोड ५७ लाख १४ हजार र त्रिवेणी नगरपालिकाले रु ५४ करोड ९५ लाख ७२ हजारको बजेट ल्याएका छन्। बडीमालिका नगरपालिकाले रु ५१ करोड ६९ लाख १९ हजारको बजेट सार्वजनिक गरेको छ।

गाउँपालिकामध्ये खप्तड छेडेदह गाउँपालिकाले रु ५३ करोड १५ लाख ६९ हजारको बजेट ल्याएको छ। स्वामीकार्तिक खापर गाउँपालिकाले रु ४४ करोड १६ लाख २ हजार, हिमाली गाउँपालिकाले रु ४३ करोड ६८ लाख ३९ हजार, गौमूल गाउँपालिकाले रु ४० करोड ३१ लाख २९ हजार तथा जगन्नाथ गाउँपालिकाले रु ३८ करोड ६३ लाखको बजेट सार्वजनिक गरेका छन्।

त्रिवेणी नगरपालिकाले चालुतर्फ रु ३५ करोड १८ लाख ४४ हजार र पुँजीगततर्फ रु १९ करोड ७७ लाख २८ हजार विनियोजन गरेको छ। बुढीनन्दा नगरपालिकाले चालुतर्फ रु ३७ करोड ९४ लाख ४८ हजार र पुँजीगततर्फ रु १९ करोड ८ लाख ४८ हजार छुट्याएको छ। हिमाली गाउँपालिकाले चालुतर्फ रु २५ करोड ६८ लाख २१ हजार र पुँजीगततर्फ रु १८ करोड १ हजार विनियोजन गरेको जनाएको छ। गौमूल गाउँपालिकाले चालुतर्फ रु २८ करोड ६० लाख २७ हजार र पुँजीगततर्फ रु ११ करोड ७१ लाख २ हजार बजेट प्रस्ताव गरेको छ।

स्थानीय तहहरूले आगामी वर्षको बजेटमार्फत शिक्षा र स्वास्थ्य सेवाको गुणस्तर सुधार, कृषि उत्पादन तथा उत्पादकत्व वृद्धि, सडक तथा अन्य भौतिक पूर्वाधार निर्माण, पर्यटन प्रवर्द्धन र रोजगारी सिर्जनामा जोड दिएका छन्। बजेटमा स्थानीय स्रोतसाधनको उपयोग, सेवा प्रवाह सुधार तथा आर्थिक गतिविधि विस्तारका कार्यक्रमसमेत समेटिएका छन्।

स्थानीय तहका जनप्रतिनिधिहरूले बजेटले विकास निर्माणका कामलाई गति दिनुका साथै नागरिकको जीवनस्तर सुधार, कृषि उत्पादन वृद्धि र स्थानीय अर्थतन्त्र सुदृढ बनाउन सहयोग पुग्ने विश्वास व्यक्त गरेका छन्।