नेपाल पूर्वाधार झापा– झापाको कचनकवल गाउँपालिका–१ घेराबारीस्थित नेपाल–भारत सीमाको दशगजा क्षेत्रमा भारतीय नागरिकले बाटो खन्न थालेपछि स्थानीयवासीले अवरोध गरेका छन्।
गए रातिदेखि भारतीय नागरिकले बाटो खनेपछि अवरोध गरिएको कचनकवल–१ का वडाध्यक्ष रञ्जित लिम्बूले जानकारी दिए। “दशगजामा भारतीय नागरिकले बाटो खनेको थाहा पाएपछि हामीले रोकेका हौ ” उनले भने, “मान्छे नभएको बेला राति–राति बाटो खन्ने गरिएको रहेछ।” यसअघि पनि पटक–पटक बाटो खन्न खोज्दा अवरोध गरिएको उनले बताएका छन्।
हाल उक्त स्थानमा करिब १५० मिटर बाटो खनिसकिएको उनले बताए । “हामीले खनिएको बाटो पुर्ने प्रयास गरेका छौं”, उनले भनेका छन्, “तर, हामीलाई दिइएको छैन।” कचनकवल–१ को वडा कार्यालयदेखि करिब चार सय मिटर बाटो दशगजामा खनिएको उनले बताए । झापाका प्रमुख जिल्ला अधिकारी बन्धुप्रसाद बाँस्तोलाले दशगजा नजिकै सडक खनिएपछि दुवै पक्षबीच विवाद भएको बताएका छन्। विवाद बढेपछि काम बन्द गरेर छलफल भइरहेको जानकारी दिएका छन्। रासस
