नेपाल पूर्वाधार 
दैलेख। दैलेखका स्थानीय तहका ९० वडामा राष्ट्रय प्रसारण प्रणालीकाे विद्युत पहुँच पुगेकाे छ । नेपाल विद्युत प्राधिकरणले विद्युतीकरण विस्तार गरी ११ स्थानीय तहका यी वडामा विद्युत पहुँच पुर्याएकाे हाे ।
जिल्लामा अहिलेसम्म ७० प्रतिशत विद्युतीकरण भइसकेकाे प्राधिकरण दैलेख वितरण केन्द्रका प्रमुख नरेशदत्त रावलले बताए । उनका अनुसार जिल्लाका १५ हजार ८ सय घरधुरीमा विद्युत पहुँच पुगेकाे छ ।
पछिल्लाे २ महिनामा मात्रै जिल्लाका ८ सय घरधुरीमा विद्युतीकरण विस्तार भएकाे पनि रावलले जानकारी दिए । जिल्लामा विद्युतीकरणले तीव्रता पाएसँगै दैलेखमा प्राधिकरणका ग्राहककाे संख्या पनि बढेकाे उनले बताए ।
दैलेखका ९० वडामध्ये हालसम्म ८२ वडामा विद्युतीकरणको काम सम्पन्न भएको वितरण केन्द्रले जनाएकाे छ । “विद्युतीकरणको तीव्र विस्तारसँगै विद्युतका उपभाेक्ताको सङ्ख्या बढ्दै गएको छ । दुई महिनाको अवधिमा थप ८ सय घरधुरीमा विद्युत् विस्तार भएको छ”, रावलले भने ।
जिल्लाका आठविस नगरपालिका, ठाँटिकाँध गाउँपालिका र चामुण्डाविन्द्रासैनी नगरपालिकाका केही वडामा मात्र विद्युतीकरणको काम हुन बाँकी छ । रावलका अनुसार मङ्गलबार मात्र ठाँटिकाँध गाउँपालिका–५ का ६ सय घरधुरीमध्ये ५ सय ५० घरमा बत्ती बालिएको छ ।
स्थानीय सरकार सञ्चालनमा आएसँगै दैलेखमा विद्युतीकरणले तीव्रता पाएको हो । सामुदायिक विद्युतीकरणअन्तर्गत स्थानीय तहले विद्युत् विस्तारको कामलाई अघि बढाएका थिए । हाल सामुदायिक विद्युतीकरणअन्तर्गत केही स्थानीय तहको काम प्राधिकरणकाे दैलेख वितरण केन्द्र मातहत हुँदै आएको छ ।
