नेपाल पूर्वाधार 
काठमाडौं । स्वतन्त्र ऊर्जा उत्पादकहरूको संस्था, नेपाल (इप्पान) को नयाँ कार्यसमिति चयनका लागि भएको उम्मेदवारी दर्तामा केही व्यक्तिले विधान विपरित उम्मेदवारी दर्ता गरिएको भन्दै उजुरी परेको छ ।
मंगलबार अध्यक्ष, वरिष्ठ उपाध्यक्ष र महासचिवमा २÷२ जनासहित ३८ जनाको उम्मेदवारी दर्ता गरेका छन् तर विधानको दफा १५ मा इप्पानको कार्य समितिको पदाधिकारीहरुको लागि एक कार्यकाल कार्य समितिमा बसेको हुनुपर्ने उल्लेख छ । सो विपरित उम्मेदवारी दर्ता गरेको भन्दै निर्वाचत समिति समक्ष उम्मेदवारी रद्धको माग गर्दै उजुरी परेको हो । प्रतिष्पर्धी उम्मेदवारहरुले नै उजुरी दिएका छन् ।
उजुरीमा उम्मेद्वारहरु वरिष्ठ उपाध्यक्ष सुर्य अधिकारी, उपाध्यक्षद्धय वीरेन्द्र मल्ल र दीपेन्द्र बम, महासचिव विनोद देवकोटा र सचिवका नारायण कँडेलको उम्मेदवारी रद्ध गर्न माग गरिएको छ ।
प्रमुख निर्वाचन अधिकृत चिरञ्जीवी खतिवडाले निर्वाचनको सम्बन्धमा विभिन्न उजुरी परेको र उजुरीमा गरिएको मागअनुसार विधान अनुसार भए नभएको अध्ययन गरिने बताए ।
२०७८ सालमा संसोधन भएको विधानअनुसार वरिष्ठ उपाध्यक्ष अध्यक्षमा चयन हुनेबेला अर्थात २०८३ देखि मात्र लागू हुने भन्दै उम्मेदवारी रद्ध गरेमा अदालतमा जाने तयारी उजुरी परेका उम्मेदवारहरुको छ । उनीहरुले यसपाली भन्दा पनि अर्को पालीदेखि यो व्यवस्था लागू हुने भएकोले उम्मेदवारी रद्ध नहुने दाबी गरेका छन् ।
प्रतिष्पर्धी उम्मेदवारहरुले भने विधानमै आँच आउने गरी उम्मेदवारी दर्ता गरेको भन्दै यो स्वत रद्ध हुने दाबी गरेका छन् । इप्पानको नयाँ कार्य समितिको लागि यही जेठ ३२ गते निर्वाचन हुँदैछ । हायात होटलमा हुने इपानको २१ औं साधारणसभाको उद्घाटन प्रधानमन्त्री पुष्पकमल दाहालले गर्ने कार्यक्रम छ । उद्घाटनपछि निर्वाचन गर्ने कार्यतालिका छ ।
