नेपाल पूर्वाधार 
काठमाडौं । चम्पादेवी हाइड्रोपावर कम्पनीले निर्माण गरिरहेको चेपे ए जलविद्युत आयोजना (७ मेगावाट) को साइट अफिस र पावर हाउसमा एक समूह प्रवेश गरी कार्यालयका सामान तथा सवारी साधनमा तोडफोड गरेको छ ।
तोडफोड र आगजनीबाट कम्पनीलाई ३ करोड रुपैयाँ बराबरको क्षति कम्पनीले जानकारी दिएको छ । लमजुङ र गोरखा जिल्लामा निर्माणाधीन रहेको यो आयोजनामा भएको घटनाले स्वतन्त्र ऊर्जा उत्पादकहरुको संस्था, नेपाल (इप्पान) लाई स्तब्ध बनाएको छ ।
इप्पानले एक विज्ञप्ति जारी गरी राइनास नहरसँगको सरोकारको विषयमा भएको असमझदारीपश्चात घटाइएको उच्छृङखल तथा अराजक घटनाको भत्र्सना र निन्दा गरेको छ ।
‘हरेक आयोजनाहरु र त्यसका सरोकारवाला पक्षहरुबिचको कुनै पनि असमझदारी आपसी संवाद र छलफलबाटै समाधान गर्न सकिनेतर्फ ईप्पान जोड दिन चाहन्छ’ विज्ञप्तिमा उल्लेख छ । विगतदेखि नै जलविद्युत आयोजनाहरुले यस्ता थुप्रै अप्रिय घटनाहरुको सामना गरिरहनुपरेको इप्पानले उल्लेख गरेको छ ।
एक पक्षीय ढंगले आफ्ना माग पुरा गराउन आयोजनालाई गम्भीर क्षति पुर्याउने तथा प्रवर्द्धक एवम् कर्मचारीहरुलाई मानसिक र भौतिक रुपमा डर, त्रास पैदा गराउने नियोजित उद्देश्यले त्यस खालका अराजक र उदण्ड गतिबिधि हुने गरेको इप्पानको भनाइ छ ।
यस प्रकारका अपराधिक गतिबिधिले यो क्षेत्र निरुत्साहित हुने भएकाले उनले सम्बन्धित निकायको गम्भीर ध्यानाकर्षण गराएको छ । परियोजनाहरुको कार्यस्थलमा हुने गरेका यस्ता घटनाहरुलाई निरुत्साहित गर्न तत्काल छुट्टै सुरक्षा संयन्त्र निर्माण गर्न माग गरेको छ ।
राष्ट्रिय प्राथमिकता प्राप्त जलविद्युत आयोजनाहरुमा यस्ता कार्यहरु निरुत्साहित गरी सुरक्षाको प्रत्याभुति गराउनुका साथै तत्काल यस घटनाको निष्पक्ष छानविनको माग गरेको छ । साथै दोषी उपर कानुनी कारवाही र पीडक पक्षबाटै पीडित पक्षको क्षतिपूर्ति भराउने व्यवस्था मिलाउन ईप्पानले सरकारसँग जोडदार माग गरेको छ ।
