Nepal Purbadhar

आइतवार, अशोज १६, २०७९
Sunday, October 2, 2022

आइतवार, अशोज १६, २०७९
Sunday, October 2, 2022

वर्षामा देशभरका सामरिक सडक सुचारु राख्न २१८ उपकरण परिचालन


काठमाडौं । यो वर्षको वर्षायाममा देशभरका सामरिक सडक संजाल (एसआरएन) सुचारु राख्न सडक विभागले २१८ उपकरण (इक्यूप्मेण्ट) परिचालन गरेको छ । विभागले आवश्यकता अनुसार पहिरोको जोखिम युक्त क्षेत्रमा ती उपकरण परिचालन गर्नुका साथै अन्य उपकरणहरु सडक विभागका विभिन्न कार्यालयमै ‘स्ट्याण्ड बाइ’ राखेको छ ।

सडक विभागका उपमहानिर्देशक भिमार्जुन अधिकारीका अनुसार संभावित जोखिम हुन सक्ने ठाँउ पहिचान गरी ९३ वटा हेभी इक्यूप्मेण्ट परिचालन गरिएको छ । त्यस्तै, हुन सक्ने जोखिमको आंकलन गरी १२५ वटा हेभी इक्यूप्मेण्टलाई तयारी अवस्था (स्ट्याण्ड बाइ) मा राखिएको छ ।

विभागसँग पहिरो पन्छाउने विशेष उपकरण १४३ वटा छन । विशेष उपकरणमा लोडर, एक्जाभेटर, ब्याकहो लोडर डोजर रहेका छन् । त्यस्तै, सहायक उपकरणहरु ७५ वटा रहेका छन् । सहायक उपकरणमा ट्रक, ट्रान्सपोर्टर, क्रेन, फ्याट बेड, टिपर, मोबाइल क्रेन, मोटर गे्रडर, एयर कम्प्रेसरलगायत पर्छन ।

सडक डिभिजन तथा योजना कार्यालयहरुले संघीय सडक सुपरिवेक्षण तथा अनुगमन कार्यालय मातहत रही विभिन्न हेभी इक्यूप्मेण्ट डिभिजनहरुसँग रहेका उपकरणहरु आवश्यकता परिचालन गरिरहेका छन् । उपकरणहरु पहिरोको जोखिमयुक्त क्षेत्रमा परिचालन गर्नुका साथै अन्य उपकरणहरु सडक विभागका विभिन्न कार्यालयमै तयारी अवस्थामा राखिएका छन् ।

काठमाडौं डिभिजनमा ३८, जनकपुरमा १५

सडक विभागले देशभरका ८ वटा हेभी इक्यूप्मेण्ट डिभिजनमार्फत उपकरण परिचालन गरिरहेको छ । विभागका अनुसार काठमाडौं हेभी इक्यूप्मेण्ट डिभिजनमा सबैभन्दा धेरै ३८ वटा हेभी इक्यूप्मेण्ट परिचालन गरेको छ । त्यसमध्ये १९ वटा संभावित जोखिम क्षेत्रमा खटाइएको छ भने १९ वटा तयारी अवस्थामा राखिएको छ ।

त्यस्तै, जनकपुर डिभिजनमा भने कार्यक्षेत्रमा एउटा मात्र खटाइएको छ भने तयारी अवस्थामा १४ वटा राखिएका छन् । यस डिभिजनमा सबैभन्दा न्यून १५ वटा मात्र हेभी इक्यूप्मेण्ट परिचालन गर्न लागिएको छ । पहिरोको जोखिम न्यून भएका कारण उपकरणको परिचालन पनि न्यून गरिएको हो ।

त्यस्तै, इटहरी डिभिजनका लागि ३२ वटा हेभी इक्यूप्मेण्ट छुट्याइएको छ । त्यसमध्ये १५ वटालाई संभावित जोखिम भएको स्थानमा र १७ वटालाई तयारी अवस्थामा राखिएको छ । हेभी इक्यूप्मेण्ट डिभिजन हेटौडामा २३ वटा (८ वटा स्थलगत र १५ वटा तयारी अवस्थामा), बुटवलमा २७ वटा (८ वटा स्थलगत र १९ वटा तयारी अवस्थामा) पोखरामा २९ वटा (१० वटा स्थलगत र १९ वटा तयारी अवस्थामा) नेपालगञ्जमा ३३ वटा (१७ वटा स्थलगत र १६ वटा तयारी अवस्थामा) परिचालन गरिएको छ ।

गोदावरी डिभिजनमा भने १५ वटा स्थलगत र ६ वटा तयारी अवस्थामा राखिएको छ । कुल २१ वटा हेभी इक्यूप्मेण्ट परिचालन गरिएको छ ।


Read Previous

पाकिस्तानले ७२० मेगावाटको करोट आयोजना सञ्चालनमा ल्यायो, लोडसेडिङ न्युनिकरणमा राहत

Read Next

प्राधिकरणले अन्तरदेशीय विद्युत व्यापारबाट १ अर्ब ७२ करोड आम्दानी गर्याे

Leave a Reply

Your email address will not be published.