नेपाल पूर्वाधार 
काठमाडौं। अविरल वर्षाका कारण कालीगण्डकी करिडोरअन्तर्गतको २२० केभी प्रसारण लाइनमा क्षति पुगेको छ । प्रारम्भिक विवरणअनुसार म्याग्दीस्थित दाना-कुश्मा खण्डका टावर नम्बर २१ र २२ मा क्षति पुगेको नेपाल विद्युत् प्राधिकरणले जनाएको छ ।
क्षति पुगेका स्थानमा पुग्ने बाटो अवरुद्ध भएकाले प्रसारण संरचनामा भएको क्षतिको विस्तृत विवरण संकलन गर्न समस्या भएको प्राधिकरणले जनाएको छ । क्षति पुगेका टावरसहित अन्य क्षेत्रमा समेत स्थलगत निरीक्षण गर्न टोली पठाउने तयारी भइरहेको छ ।
अविरल वर्षाका कारण म्याग्दी, बागलुङ, तनहुँको झापुटार सबस्टेशन, मनाङ, मुस्ताङ, रुकुम पूर्व, प्युठान र रोल्पामा विद्युत् सेवा प्रभावित भएको थियो ।
प्राधिकरणका अनुसार म्याग्दी, बागलुङ, तनहुँको झापुटार सबस्टेशन र रुकुम पूर्वमा विद्युत् सेवा सुचारु भइसकेको छ ।
त्यस्तै, मुस्ताङ, प्युठान र रोल्पामा आज अपराह्नसम्म विद्युत् सेवा सञ्चालन गर्ने लक्ष्य राखिएको छ । मनाङमा भने भोलिसम्म विद्युत् सेवा सुचारु गर्ने योजना रहेको प्राधिकरणले जनाएको छ ।
प्राधिकरणले अवरुद्ध विद्युत् सेवा सञ्चालन गर्न प्राविधिक टोलीलाई प्रभावित क्षेत्रमा परिचालन गरेको जनाएको छ । प्रसारण तथा वितरण संरचनामा पुगेको क्षतिको अवस्थाअनुसार मर्मत तथा पुनःस्थापनाको काम अघि बढाइने प्राधिकरणले जनाएको छ ।
