नेपाल पूर्वाधार 
काठमाडौं । साझा यातायातले काठमाडौं उपत्यकाभित्र रहेका सम्पदा क्षेत्रमा पर्यटकलाई अवलोकन गराउन सम्पदा ‘यात्रा सेवा’ चाडै शुरु गर्ने भएको छ ।
साझा यातायात सञ्चालक समितिका सदस्य भुषण तुलाधर करिब ३ महिनाभित्र सेवा शुरु गरिनेछ । यस सेवा अन्तर्गत साझा बसले काठमाडौं र ललितप्रका ५ यूनेस्को विश्व सम्पदा क्षेत्र जोड्नेछ ।
यो सेवाले पाटन दरबार स्क्वायर, काठमाडौं दरबार स्क्वायर, पशुपतिनाथ मन्दिर, बौद्ध, स्वयम्भू मन्दिर बाहेक नारायणहिटी संग्रहालय, राष्ट्रिय संग्रहालय, राष्ट्रिय इतिहास संग्रहालय, ठमेल, कमलपोखरी र दरबारमागको पर्यटन र संस्कृति प्रवद्र्धन गर्नेछ ।
अग्रेजीमा ‘हप–अन–हप–अफ’ नाम दिइएको यस सेवाको सोमबार क्षेत्रगत परिक्षण गरिएको छ । साझा यातायातले पर्यटन मन्त्रालय, नेपाल पर्यटन बोर्ड, काठमाडौं उपत्यका ट्राफिक प्रहरी कार्यालय, काठमाडौं नगरपालिका र ललितपुर नगरपालिकाको संयुक्त सहकार्यमा ‘सम्पदा यात्रा’ अन्तर्गत हप अन हप अफ बस सेवा परीक्षण सञ्चालन गरेको हो ।
यस सेवा सञ्चालनले पर्यटकलाई सम्पदा क्षेत्रको अवलोकन गर्न सजिलो हुनेछ ।
साझा यातायातका अनुसार अहिले विभिन्न रुटमा ७१ ओटा बस सञ्चालनमा छन् । पछिल्लो पटक सन् २०११ को मध्यदेखि पुनः सेवा शुरु गरेको हो ।
तत्कालिन साझा यातायातको बोर्डले श्रम तथा यातायात मन्त्रालयसँगको समन्वयमा साझा यातायातलाई पुनरुत्थान गर्ने रणनीति बनाएको थियो । त्यसैअनुसार यातायात यातायात सञ्चालनमा ल्याएको हो ।
पहिलो पटक सन् १९६१/१९६२ मा सञ्चालनमा आएको साझा यातायात १९९० को दशकमा सञ्चालन व्यवस्थित नहुँदा सेवा नै बन्द गरिएको थियो ।
