नेपाल पूर्वाधार 
काठमाडौं । आगामी फागुन १२ र १३ गते (२३ र २४ फेब्रवरी, २०२३) आठौं ऊर्जा सम्मेलन आयोजना हुने भएको छ । स्वतन्त्र ऊर्जा उत्पादकहरूको संस्था, नेपाल (इपान) को अगुवाईमा तेस्रो संस्करणको ऊर्जा सम्मेलन राजधानीमा आयोजना हुन लागेको हो ।
सम्मेलनमा ऊर्जा क्षेत्रका विविध विषयमा छलफल तथा बहसहरू हुने इपान उपाध्यक्ष गणेश कार्कीले बताए । उनका अनुसार दुई दिनसम्म चल्ने सम्मेलनमा ऊर्जा क्षेत्रको विकास, यो क्षेत्रको विस्तामा अहिलेसम्म भएको प्रगति तथा आन्तरिक एवं अन्तरदेशीय विद्युत व्यापारका विषयमा पनि वृहत छलफल हुनेछ ।
‘२ दिने ऊर्जा सम्मेलन आयोजना गर्ने तयारी गरिरहेका छौं,’ उनले नेपाल पूर्वाधारसँग भने,‘भइरहेको तयारीबारे चाँडै पत्रकार सम्मेलन गरेर जानकारी गराउनेछौं ।’ उनले निजी क्षेत्र सक्रिया हुँदा आन्तरिक विद्युत उत्पादन बढ्दै गएको हुँदा आगामी सम्मेलनमा आन्तरिक विद्युत खपत वृद्धि तथा अन्तरदेशीय विद्युत व्यापारलाई मुख्य एजेण्डा बनाएर छलफल गरिने पनि बताए ।
इपानले अर्का उपाध्यक्ष आशीष गर्गको संयोजकत्वमा सम्मेलनको तयारी समिति गठन गरेको छ । ऊर्जा सम्मेलनमा ऊर्जा क्षेत्रमा क्रियाशिल राष्ट्रिय तथा अन्तर्राष्ट्रिय सरोकारवालाहरूलाई आमन्त्रण गरिने इपानले जनाएको छ ।
यसअघि सन् २०१९ मा दोस्रो ऊर्जा सम्मेलन भएको थियो । यो सम्मेलनले विद्युत व्यापारको मुद्दा उठाएको थियो ।
यस्तै, सन् २०१७ मा पहिलो सम्मेलन सम्पन्न भएको थियो । यो सम्मेलनले ‘१० वर्षमा १० हजार मेगावाट’ विद्युत उत्पादन नारा दिएको थियो ।
