नेपाल पूर्वाधार 
चितवन। पृथ्वी राजमार्गअन्तर्गत चितवनको इच्छाकामना गाउँपालिका-४ स्थित घोप्टेभिरमा खसेको पहिरो पन्छाएर दिउँसो १ बजेसम्म सडक दुईतर्फी सञ्चालनमा ल्याउने तयारी गरिएको छ।
सोमबार बिहान करिब ५ बजे सडक माथिबाट सुक्खा पहिरो खसेपछि पृथ्वी राजमार्ग अवरुद्ध भएको हो। पहिरो हटाउन सडकको दुवैतर्फबाट उपकरण परिचालन गरी काम तीव्र पारिएको छ।
नागढुङ्गा-मुग्लिन सडक योजना पश्चिम खण्डका प्रमुख सजना अधिकारीका अनुसार मुग्लिनतर्फबाट सडक डिभिजन कार्यालय भरतपुरको लोडर प्रयोग गरिएको छ। यस्तै, काठमाडौं तर्फबाट २ ओटा एक्साभेटर, एउटा जेसीबी र एउटा लोडर परिचालन गरिएको छ।
सडक केही सफा भएपछि काठमाडौं तर्फबाट एउटा एक्साभेटर मुग्लिनतर्फ पठाएर पहिरो पन्छाउने योजना रहेको अधिकारीले जानकारी दिइन्। थप पहिरो नखसेमा दिउँसो १ बजेसम्म सडक सञ्चालनमा आउने उनको भनाइ छ।
घोप्टेभिरमा निरन्तर सुक्खा पहिरो खसिरहेकाले सडक खुलाउन ढिलाइ भइरहेको छ। यसअघि राति १ बजे खसेको पहिरो पन्छाएर सडक सञ्चालनमा ल्याइएको थियो। तर, बिहान ५ बजे पुनः पहिरो खसेपछि यातायात अवरुद्ध भएको हो।
पहिरो खसेको स्थान मुग्लिनबाट करिब ३ किलोमिटर मलेखुतर्फ पर्छ। सोही स्थानमा आइतबार पनि सुक्खा पहिरो खसेर केही समय सडक अवरुद्ध भएको थियो।
