नेपाल पूर्वाधार 
काठमाडौं । चालु आर्थिक वर्षको पहिलो ८ महिना (फागुनसम्म) मासुरक्षित नागरिक आवास कार्यक्रम अन्तर्गत ७५३ स्थानीय तहका १ लाख ८९ हजार २ सय ३० फुसका छानालाई जस्तापाताले विस्थापन गर्न आवास संख्या निर्धारण भएको छ ।
यस अवधिमा १ लाख ३७ हजार १५ लाभग्राही छनौट भइसकेका छन । फागुसम्म १ लाख २६ हजार ६ सय ९८ लाभग्राहीसँग सम्झौता भएको छ । त्यसैगरी, २४ हजार ५ सय ९७ आवास इकाईहरूको निर्माण सम्पन्न भएको छ ।
सघन शहरी विकास कार्यक्रम अन्तर्गत ९० किलोमिटर सडक स्तरोन्नति र ११५ किलोमिटर नाला निर्माण सम्पन्न भएको छ । यो काम तराई मधेशका जिल्ला सदरमुकाममा भएको हो । पूर्वाधार कार्यक्रम अन्तर्गत सडक स्तरोन्नति र नाली बनाउने काम भएको हो ।
टेकु स्थित बागमती नदी किनारमा अवस्थित २८ धार्मिक, सांस्कृतिक तथा पुरातात्विक महत्वका धरोहरहरूको पुनःनिर्माण कार्य ६० प्रतिशत सम्पन्न भएको छ । बागमती नदीमा सुख्खायाममा समेत न्यूनतम बहाव कायम राखे उद्देश्यले निर्माण शुरु गरिएको धाप ड्याम निर्माण करिव सम्पन्न भएको छ । आगामी आर्थिक वर्ष ड्याममा पानी जम्मा गरी हिउँदमा पानी छोडिने व्यवस्था गरिएको छ
देशभर २७ नयाँ शहर र १३ स्मार्ट शहरको पूर्वाधार निर्माण कार्य शुरू भएको छ । मध्यपहाडी र हुलाकी राजमार्गका २७ स्थानमा नयाँ शहर विकास कार्यक्रम अन्तर्गत फागुनसम्म ३५ किलोमिटर सडक ट्र्याक खोलेर स्तरोन्नति र ग्राभेल गर्ने कार्य सम्पन्न भएको छ ।
त्यस्तै, १८ किलोमिटर सडक कालोपत्रे भएको छ । त्यसैगरी, २३ किलोमिटर सतह नालाको निर्माण कार्य सम्पन्न भएको छ । शहरहरूको योजनाबद्ध रूपमा एकीकृत विकास गर्न १८५ नगरपालिकाहरूको एकीकृत शहरी विकास योजना तयार गरिएको छ ।
काठमाडौ उपत्यकामा उत्सर्जन हुने फोहरमैला व्यवस्थापन गर्न निर्माणाधीन बञ्चरेडाडाँ ल्यान्डफिल साईटको पहिलो चरणको ८० प्रतिशत र दोस्रो चरणको ९० प्रतिशत निर्माण सम्पन्न भएको छ ।
