नेपाल पूर्वाधार 
काठमाडौं । सरकारले पेट्रोलियम पदार्थमा लगाउँदै आएको पूर्वाधार विकास करबाट प्रतिलिटर ५ रुपैयाँ १२ सय मेगावाटको बूढीगण्डकी जलाशय जलविद्युत आयोजनामा लगानीका लागि छुट्याउने भएको छ । पेट्रोल तथा डिजल/मट्टीतेलमा प्रतिलिटर १० रुपैयाँ पूर्वाधार विकास कर लिइँदै आएकोमा त्यसमध्येबाट ५ रुपैयाँ बूढीगण्डकी आयोजना निर्माणमा लगानी गरिने भएको हो ।
बिहीबार बसेको मन्त्री परिषद बैडकले फेरि पेट्रोलियम करको प्रतिलिटर ५ रुपैयाँ बूढीगण्डकी आयोजनालाई छुट्याउने निर्णय भएको सञ्चार तथा सूचना प्रविधि मन्त्री एवं सरकारका प्रवक्त रेखा शर्माले जानकारी दिइन् । उनका अनुसार बूढीगण्डकी स्वदेशी लगानीमा नै निर्माण गर्ने प्रक्रिया अघि बढिसकेकाले लगानीका लागि करबापतको रकम छुट्याउने निर्णय भएको हो ।
यसअघि नेपाल आयल निगमले आर्थिक वर्ष २०७३/७३ देखि बूढीगण्डकी आयोजना शिर्षकमा नै पेट्रोलियम करबापतको प्रतिलिटर ५ रुपैयाँ छुट्याउँदै आएको थियो । ३ वर्षसम्म बूढीगण्डकी आयोजना शिर्षकमा करको रकम जम्मा गरेपछि २०७६ साल फागुनदेखि बूढीगण्डकी आयोजना शिर्षकमा नभई पूर्वाधार विकास करको नाममा प्रतिलिटर १० रुपैयाँ लिँदै आएको थियो ।
मन्त्रीपरिषदको बिहीबारको निर्णयपछि अब पूर्वधार विकासका लागि लिइँदै आएको प्रतिलिटर १० रुपैयाँ मध्येबाट ५ रुपैयाँ स्वतः बूढीगण्डकी आयोजनाको नाममा जाने शर्माले बताइन् । बूढीगण्डकी जलाशय स्वदेशी लगानीमा निर्माण गर्न भन्दै आयोजना स्थलमा स्थानीय कार्यालय पनि स्थापना गरिसकिएको छ । आयोजनाको मुआब्जा वितरणको काम करिब पूरा भइसकेको छ ।
