नेपाल पूर्वाधार 
गणेश नेपाली मृत्यु प्रकरणमा न्यायिक समिति गठन, सात दिनभित्र प्रतिवेदन बुझाउनुपर्ने
काठमाडौँ । सरकारले मुगुको सोरु गाउँपालिका–१ का गणेश नेपालीको मृत्यु प्रकरणको सत्यतथ्य छानबिन गर्न न्यायिक समिति गठन गरेको छ ।
प्रधानमन्त्री तथा मन्त्रिपरिषद्को कार्यालय, सिंहदरबारमा आज बसेको मन्त्रिपरिषद्को बैठकले उच्च अदालतका पूर्वन्यायाधीश केशवप्रसाद बास्तोलाको संयोजकत्वमा तीन सदस्यीय छानबिन समिति गठन गरेको हो ।
समितिमा पूर्वसहन्यायाधिवक्ता कृष्णमोहन कोइराला र पूर्वसहसचिव रामुराज कडरिया सदस्य रहेका छन् । मन्त्रिपरिषद्ले समितिलाई गठन भएको मितिले सात दिनभित्र घटनाको छानबिन गरी प्रतिवेदन नेपाल सरकारसमक्ष पेस गर्न जिम्मेवारी दिएको छ ।
नेपालीको गत असार २६ गते काठमाडौँस्थित वीर अस्पतालको बर्न युनिटमा उपचारका क्रममा मृत्यु भएको थियो । उनको मृत्युपछि घटनाको सत्यतथ्य छानबिनको माग उठ्दै आएको थियो ।
यसै विषयमा नेपाल सरकार, काठमाडौँ महानगरपालिका र पीडित पक्षबीच नौबुँदे सहमति भएको थियो । सहमतिको पहिलो बुँदामा घटनाको सत्यतथ्य र निष्पक्ष छानबिन गर्न नेपाल सरकारले पूर्वन्यायाधीशको संयोजकत्वमा यथाशीघ्र स्वतन्त्र छानबिन समिति गठन गर्ने र समितिले गठन भएको मितिले सात दिनभित्र प्रतिवेदन सरकारसमक्ष पेस गर्ने उल्लेख थियो ।
सोही सहमतिअनुसार मन्त्रिपरिषद्ले न्यायिक समिति गठन गरेको हो । समितिले घटनासँग सम्बन्धित तथ्य, कारण र जिम्मेवार पक्षबारे अध्ययन गरी निर्धारित समयभित्र सरकारलाई प्रतिवेदन बुझाउनेछ ।
