नेपाल पूर्वाधार 
काठमाडौं । नेपाल आयल निगमले केही उद्योगले क्षमताभन्दा बढी ग्यास भरेर बिक्री वितरण गरिरहेकाे भन्ने खबर प्रति ध्यानाकर्षण भएको जनाएको छ । निगमले बिहीबार सूचना सार्वजनिक गरी केही उद्योगले १४.२ किलो क्षमताभन्दा बढी (५० र ४५० किलो) का सिलिन्डरमा ग्यास भरी बिक्री वितरण गरेको भन्दै ध्यानाकर्षण भएको जनाएको हो ।
निगममा आबद्ध केही ग्यास उद्योगहरूले बढी क्षमताका सिलिन्डर भरी बिक्री वितरण गर्न अनुमति माग गरेकोमा एलपि ग्यास विनियमावली, २०६५ (संशोधन सहित) अनुसार अनुमति दिन नसक्ने जानकारी गराइसकेको पनि सूचनामा भनिएको छ ।
निगमले तोकेको १४.२ किलो भन्दा बढी क्षमताका सिलिन्डरमा ग्यास भरेर बिक्री वितरण गर्नु विनियमावलीमा भएको व्यवस्था विपरित हुने भन्दै यस्तो कार्य भइरहेको भए तत्कालन बन्द गर्न आग्रह समेत गरेको छ ।
सचेत गराउँदा गराउँदै बढी क्षमताका ग्यास सिलिन्डर बजारमा बिक्री वितरण गरिएको पाइएमा विनियमावलीमा भएको व्यवस्था बमोजिम कारबाही गर्ने चेतावनी पनि निगमले दिएको छ । साथै, १४.२ किलो क्षमताभन्दा बढी ग्यास सिलिन्डरको प्रयोग गर्नु कानून विपरित भएको हुँदा उपयोग नगर्न ग्राहक वर्गमा समेत निगमले आग्रह गरेको छ ।
