नेपाल पूर्वाधार 
काठमाडौं । जर्मनीकाे ट्र्याकबेल इन्जिनियरिङ कम्पनीले औद्योगिक घराना गोल्यान समूहले प्रवर्द्धन गर्ने ४४१ मेगावाटका २ अर्धजलाशय जलविद्युत आयोजनाको विस्तृत इन्जिनियरिङ अध्ययन गर्ने भएको छ । ट्र्याकबेल इन्जिनियरिङले कर्णाली प्रदेशको मुगु जिल्लामा पहिचान भएका ३०६ मेगावाटको माथिल्लो मुगु कर्णाली र १३५ मेगावाटको नाम्लाङ खोला अर्धजलाशय जलविद्युत आयोजनाको विस्तृत इन्जिनियरिङ अध्ययन गर्ने भएको हो ।
माथिल्लो मुगु कर्णालीको प्रवर्द्धक एलिवेट इनर्जी प्रालि र नाम्लाङ खोलाको प्रवर्द्धक एपोलो इनर्जी प्रालि तथा ट्र्याकबेल इन्जिनियरिङबीच २० महिनाभित्र विस्तृत अध्ययन सम्पन्न गर्ने सम्झौता भएको छ । सम्झौता अनुसार ट्र्याकबेल इन्जिनियरिङले यो अवधिमा दुवै आयोजनाको विस्तृत वातावरणीय प्रभाव अध्ययन प्रतिवेदन पनि तयार पार्नुपर्नेछ ।
सम्झौतामा ट्र्याकबेल इन्जिनियरिङका नेपाल शाखा प्रबन्धक कास्टर्न गंटरम्यान तथा गोल्यान समूहकोतर्फबाट ऊर्जा डिभिजनका प्रमुख कार्यकारी अधिकृत प्रवीण अर्याल र गोल्यान समूहका प्रबन्ध निर्देशक अक्षय गोल्यानले हस्ताक्षर गरे ।
ट्र्याकबेल इन्जिनियरिङ जलविद्युत आयोजनाको अध्ययन गर्ने विश्व प्रशिद्ध परामर्शदाता कम्पनी हो । यो कम्पनीले नेपालसहित विश्वका विभिन्न देशमा जलविद्युत सम्बन्धि अध्ययन गरेको इतिहास छ ।
गोल्यान समूहले कर्णाली प्रदेशको मुगु जिल्लामा पहिचान भएका दुवै आयोजनाको विस्तृत अध्ययन गर्न अमेरिकी वित्तीय संस्था अन्तर्राष्ट्रिय डेभलपमेन्ट फाइनान्स कर्पोरेशन (डिएफसी) बाट आर्थिक अनुदान सहयोग प्राप्त गरिसकेको छ ।
दुवै आयोजनाको विस्तृत अध्ययनका लागि डिएफसीले १० मिलियन अमेरिकी डलर (करिब १ अर्ब १० करोड रुपैयाँ) दिने सहमतिमा हस्ताक्षर भइसकेको छ । गोल्यान समूहले यी दुई आयोजनाको अध्ययनका लागि आर्थिक अनुदानको प्रस्ताव अमेरिकी फेडेरल बैंक डिएफसीलाई गरेको थियो ।
प्रस्ताव स्वीकृत भएपछि गोल्यान समूहले डिएफसीको अनुदान पाएको हो । यो रकम आयोजनाको विस्तृत अध्ययनका लागि खर्च हुनेछ । अमेरिकाले नेपालमा निजी क्षेत्रका जलविद्युत आयोजनाको अध्ययनका लागि भनेर पहिलो पटक अनुदान दिएको हो ।
३ वर्षअघि नै यी आयोजनाको अनुमतिपत्र लिइसकेकोमा कोभिड–१९ महामारीका कारण अध्ययन लम्बिन पुगेको हो । अब २० महिनाभित्र दुवै आयोजनाको विस्तृत अध्ययन पूरा गरी निर्माणमा लैजाने योजना रहेको गोल्यान समूहको ऊर्जा डिभिजनले जनाएको छ ।
अहिले दुई आयोजनाको विस्तृत अध्ययन गर्नका लागि मात्रै वैदेशिक अनुदान पाएकोमा निर्माणका लागि चाहिने लगानी पनि वैदेशिक सहयोगबाट जुटाउने गोल्यान समूहको लक्ष्य छ । दुवै अर्धजलाशय आयोजनाबाट सुख्खा याममा पनि ६ घन्टा विद्युत उत्पादन गर्न सम्भव हुने प्रारम्भिक अध्ययनले देखाएको छ ।
गोल्यान समूहले नवीकरणीय ऊर्जाको क्षेत्रमा ठूलो लगानी गरिसकेको छ । जलविद्युत र सौर्य गरी ९ सय मेगावाट बढीका आयोजना गोल्यान समूहसँग छन् । सन् २०३० सम्ममा राष्ट्रिय प्रसारण प्रणालीमा यी आयोजनाको विद्युत जोडिसक्ने लक्ष्य छ ।
