नेपाल पूर्वाधार 
काठमाडौं । काठमाडौं महानगरपालिकाले सडकमा अव्यस्थित तार हटाउनका लागि सम्बन्धित कार्यालय तथा संघसंस्थालाई १५ दिनको समय दिएको छ । महानगरपालिकाले मंगलबार सार्वजनिक सूचना प्रकाशित गरी जथाभावी लत्रिएका अनावश्यक तार हटाउन निर्देशन दिएकाे हाे ।
महानगरपालिकाकाे सहकाे सुन्दरतामा कमी आएको, सार्वजनिक आवागमनमा असर परेको र आगलागीलगायतको जोखिम सिर्जना हुनसक्ने भन्दै अनावश्यक तार तत्काल भनेकाे सूचनामा जनाइएकाे छ । महानगरले विद्युत, टेलिफोन, इन्टरनेट तथा केवल सेवा प्रदायक निकाय तथा संघ संस्थाले विद्युतीय पोलमा गुजुल्टो बनाएर राखेका, चुडिँएर तथा लत्रिएर सडकमा छरिएका तार सम्बन्धित निकायले आफैँ हटाउनु पर्ने र आवश्यक तारलाई सङ्केत चिन्ह लगाउन पर्ने भनेकाे छ ।
महानगरले उक्त अवधिमा सम्बन्धित निकायले तार नहटाए आफैँले हटाउने चेतावनी समेत जनाएकाे छ । अव्यवस्थित तारबाट सिर्जना हुनसक्ने जोखिम घटाउने विषयप्रति महानगरपालिकाले विभिन्न समयमा सरोकारवाला निकाय तथा अधिकारीसँग बैठक बसेर व्यवस्थापनका लागि अनुरोध गरिसकेको जनाएको छ । तर निर्णय कार्यान्वयनका लागि पटक–पटक पत्र पठाएर ताकेता गर्दा पनि काम नभएको महानगरपालिकाको भनाइ छ ।
यसअघि नेपाल विद्युत प्राधिकरणले पनि पटक–पटक ताकेता गरी विद्युतीय पाेलका अनावश्यक तार हटाउन भने पनि अटेरी हुँदै आएकाे छ । प्राधिकरणले केही स्थानमा आफैँले पाेलमा गुजुल्टिएका तार हटाउने प्रयास गरेपनि सबैतिरकाे हटाउन सकिएकाे छैन ।
