नेपाल पूर्वाधार 
काठमाडौं । जलस्रोत तथा सिंचाइ विभागले भेरी–बबई डाईभर्सन बहुउद्देश्यीय आयोजनाको परामर्श सम्झौता खारेज गर्ने भएको छ ।
विभागले मंगलबार इरानको परामर्शदाता कम्पनी महाब घोड्स कन्सल्टिङ इन्जिनियरिङ कम्पनीसगँगको सम्झौता रद्द गर्ने गरी सूचना जारी गरेको छ ।
भेरी–बबई डाईभर्सन बहुउद्देश्यीय आयोजनाका प्रवक्ता लेखनाथ सुवेदीका अनुसार महाब घोड्स कन्सल्टिङ इन्जिनियरिङ कम्पनीले डलर कारोबार गर्न अमेरिकाले रोक लगाएको छ । कम्पनीले डलर खाता खोल्न नसकेपछि नेपालमा बैंक कारोबार गर्न सकेन ।
यस्तो अवस्थामा आयोजनाले कम्पनीलाइ काम गर्नको लागी पटक पटक ताकेता गरेपनि काममा प्रगति हुने सम्भावना नदेखेपछि सम्झौता रद्द गरेको हो ।
यसअघि भेरी बबई डाइभर्सन बहुउद्देश्यीय परियोजना परामर्शदाताको रुपमा महाब घोड्स कन्सल्टिङ इन्जिनियरिङ कम्पनी रहेको थियो । त्यो कम्पनी २६ सेक्टेम्बर २०१९ देखि परामर्शदाता कम्पनीको रुपमा कार्यरत थियो ।
विभागले आयोजनामा भएको क्षतिको प्रमाणीकरण र क्षतिपूर्ति भराउनको लागि भुमिका खेल्न नसकेको र आफ्नो दायित्व पूरा गर्न असफल भएको कारण रद्द गर्ने निर्णयमा पुगेको हो । यो सूचना जारी भएको ३० दिन (२६ जनवरी २०२३) भित्र सम्झौता रद्द हुनेछ ।
