नेपाल पूर्वाधार 
फाइल तस्बिर।
काठमाडौं । पृथ्वी राजमार्गअन्तर्गत चितवनको इच्छाकामना गाउँपालिका-४ स्थित घोप्टेभीरमा सुक्खा पहिरो खस्दा सडक अवरुद्ध भएको छ । आइतबार बिहान करिब १० बजे पहिरो खसेपछि राजमार्गको दुवैतर्फ सवारी आवागमन रोकिएको हो ।
जिल्ला ट्राफिक प्रहरी कार्यालय चितवनका प्रमुख प्रहरी निरीक्षक अनिल थापाका अनुसार पहिरो पन्छाउने काम भइरहेको छ । थप पहिरो नखसेमा छिट्टै सडक दुईतर्फी सञ्चालनमा आउने उनले बताए ।
यसैबीच, जुम्लामा बोलेरो जीप दुर्घटना हुँदा एक जनाको मृत्यु भएको छ भने छ जना घाइते भएका छन् ।
मुगुबाट जुम्लातर्फ आउँदै गरेको क १ ज ००५४ नम्बरको जीप शनिबार साँझ कनकासुन्दरी गाउँपालिका-१ स्थित चौथामा दुर्घटना भएको हो ।
दुर्घटनामा रुकुम पूर्वको उत्तरगङ्गा गाउँपालिका-१ घर भई हाल कनकासुन्दरी गाउँपालिकामा बस्दै आएका ४२ वर्षीय सुरज पुन मगरको घटनास्थलमै मृत्यु भएको जिल्ला प्रहरी कार्यालय जुम्लाले जनाएको छ ।
दुर्घटनामा घाइते भएका छ जनालाई एम्बुलेन्समार्फत कर्णाली स्वास्थ्य विज्ञान प्रतिष्ठान पुर्याएर उपचार भइरहेको छ । उनीहरूको अवस्था सामान्य रहेको प्रहरीले जनाएको छ । जीपमा १६ जना यात्रु सवार थिए । घटनाबारे थप अनुसन्धान भइरहेको प्रहरीले जनाएको छ ।
