नेपाल पूर्वाधार 
काठमाडौं । नेपाल इन्फ्रास्ट्रक्चर बैंक लिमिटेड (निफ्रा) ले लुम्बिनी प्रदेशको सिद्धार्थनगर नगरपालिकामा १ सय शैयाको अस्पताल निर्माणमा ऋण लगानी गर्ने भएको छ । निफ्राले नबिल बैंकसँग मिलेर एडभान्स इन्टरनेसनल मल्टी स्पेसियालिटि अस्पतालको भवन निर्माण तथा सञ्चालनका लागि २ अर्ब ५४ करोड रुपैयाँ ऋण लगानी गर्न लागेको हो ।
कर्जा प्रवाह गर्ने २ बैंक र अस्पताल परियोजनाबीच बिहीबार (साउन ५ गते) वित्तीय व्यवस्थापन सम्झौतामा हस्ताक्षर भएको छ । सम्झौता अनुसार परियोजना निर्माणका लागि अगुवाई गर्ने निफ्रा बैंकले १ अर्ब ५४ करोड रुपैयाँ कर्जा प्रवाह गर्नेछ ।
नबिलले परियोजना निर्माणका लागि १ अर्ब रुपैयाँसम्म कर्जा प्रवाह गर्ने सम्झौता छ । वित्तीय व्यवस्थापन सम्झौता कार्यक्रममा निफ्रा बैंकका प्रमुख कार्यकारी अधिकृत रामकृष्ण खतिवडा, नायव महाप्रबन्धक सूर्यबहादुर तामाङ, नायव महाप्रबन्धक विनयनाथ न्यौपाने सहभागी थिए ।
नबिल बैंककोतर्फबाट प्रमूख कार्यकारी अधिकृत ज्ञानेन्द्रप्रसाद ढुंगाना, बरिष्ठ नायव प्रमूख कार्यकारी अधिकृत सुजितकुमार शाक्य, नायव प्रमुख कार्यकारी अधिकृत भुपेन्द्र पाण्डेसहित बैंकका कर्मचारी सहभागी भएका थिए ।
अस्पताल परियोजनाको तर्फबाट अध्यक्ष कमल भण्डारी लगायतका पदाधिकारीकोे उपस्थिति थियो । कार्यक्रममा अस्पतालका अध्यक्ष भण्डारीले परियोजनामा लगानीका लागि सहवित्तीयकरण सम्झौता सम्पन्न हुँदा आफु उत्साहीत भएको बताए । उनले परियोजना निर्माण कार्य समयमै सम्पन्न गरी व्यवसायीक सञ्चालन सुरु गर्ने प्रतिबद्धता जनाए ।
यो अस्पताल निर्माण सम्पन्न भई सञ्चालनमा आउँदा लुम्बिनी प्रदेशको स्वास्थ सेवामा व्यापक सुधार हुने अपेक्षा गरिएको छ ।
